Engjëlli i Tënzot: Papa kërkon solidaritetet për viktimat e uraganit në Karaibe dhe
kujton të dëmtuarit nga tërmeti në Italinë jugore.
T’i ndihmojmë banorët e Karaibeve, viktima të një uragani të ri shkatrrimtar. Me këtë
thirrje e përfundoi sot Papa lutjen e Engjëllit të Tënzot, kremtuar, si zakonisht,
në Sheshin e Shën Pjetrit, kushtuar kryesisht reflektimit mbi Sinodin e sapopërfunduar.
Papa u shprehu afërsinë edhe popullsive të Bazilikatës e të Kalabrisë, dëmtuar këto
ditë nga tërmeti. Fushatat elektorale, ndërprerë brutalisht dhe një hapësirë pa
fund, përballë sulmit të tërbuar të “Sandy”. Ky ishte kuadri i krijuar nga uragani
i ri, që në orën e lutjes së Engjëllit të Tënzot, drejtohej kah bregdeti lindor i
SHBA. Presidenti Barak Obama i anuloi mitingjet në Virgjinia, ndërsa guvernatori i
Nju Jorkut, Andrew Cuomo, shpalli gjendjen e emergjencës, në sa afrohej ai, që meteorologët,
për shkak edhe të erërave të veriut, druhen se mund të kthehet në një super-stuhi.
Por ndërkaq uragani “Sandy” ka lënë pas gjurmë të frikshme vdekjesh e shkatërrimesh,
duke rrënuar, në shfrimin e tij të tërbuar me shpejtësi prej 175 km në orë, zona të
tëra të Kubës, ku humbën jetën rreth 20 vetë, e pastaj Haitin e Xhamajkën, me 40
të vdekur. Për ta, familjarët e tyre e qindra-mijëra njerëzit, që shpëtuan gjallë,
ndonëse të dërmuar, nga tërbimi i uraganit, ngriti zërin Papa, duke u bërë zëdhënës
i tyre në lutjen e Engjëllit të Tënzot, duke u lutur e duke i bërë thirrje për solidaritet
pjesës tjetër të botës: “Dëshiroj t’i siguroj për afërsinë time dhe
kujtimin tim ata, që u dëmtuan nga kjo fatkeqësi natyrore, ndërsa i ftoj të gjithë
të luten e të jenë solidarë, për të lehtësuar dhimbjen e familjarëve të viktimave
e për t’u dhënë ndihmën e nevojshme mijëra të dëmtuarve”. Në përfundim
të përshëndetjeve pas lutjes mariane, në shtatë gjuhë, Benedikti XVI kujtoi edhe banorët
e lokaliteteve kalabreze e lukane, pranë masivit të Polinos, të dëmtuar, të premten
e kaluar, nga një lëkundje e fortë tërmeti, që shkaktoi dëme të ndjeshme. E lëkundja
e parë u pasua nga një sërë lëkundjesh të pandërprera që, sipas Institutit të Gjeofizikës,
edhe mbrëmë arritën deri në 3,2 ballë, duke shkaktuar frikë e tmerr. Edhe për këtë
rast, Papa premtoi solidaritetin e tij shpirtëror: “Siguroj se i kujtoj
në lutje popullsitë e Bazilikatës e të Kalabrisë, që u dëmtuan këto ditë nga tërmeti
.Të gjithëve ju uroj: gëzuar të dielën dhe Festën e Gjithë Shenjtorëve!”.