Камісія “Ecclesia Dei” усё яшчэ чакае афіцыйнага адказу ад Брацтва св. Пія Х
27 кастрычніка Папская
камісія “Ecclesia Dei” выступіла з заявай, у якой адзначыла, што на сённяшні дзень,
пасля трохгадовых дактрынальных і тэалагічных дыскусій, Святы Пасад працягвае чакаць
афіцыйнага адказу з боку лефэбрыстаў на два дакументы: “Summorum Pontificum” Бэнэдыкта
XVI з 2007 г. і Дактрынальную прэамбулу камісіі “Ecclesia Dei” ад 13 чэрвеня 2012
г. Менавіта ад адказу залежыць урэгуляванне кананічнага статусу Брацтва св. Пія Х
у Каталіцкім Касцёле.
Камісія “Ecclesia Dei”, спецыяльна створаная ў рамках
Кангрэгацыі Веравучэння для дыялогу з лефэбрыстамі, заяўляе, што для прыняцця правільнага
рашэння неабходныя цярпенне, спакой, настойлівасць і давер. Камісія падкрэслівае,
што Бэнэдыкт XVI моцна жадае аднаўлення і захавання адзінства ў Касцёле, у тым ліку
праз урэгуляванне адносін з Брацтвам св. Пія Х.
Станоўчы адказ на прапановы
Апостальскай Сталіцы, якія датычаць абсалютнага прызнання першынства Наступніка св.
Пятра і рашэнняў ІІ Ватыканскага Сабору, можа стаць нагодай для надання Брацтву статусу
Персанальнай прэлатуры ў рамках Каталіцкага Касцёла.