Miliona myslimanë, drejt Mekës: nisi shtegtimi i madh
Nisi zyrtarisht dje, në ditën e tetë të muajit Dhul’Hijjah, për dy milionë shtegtarë,
ardhur nga 180 vende të botës, shtegtimi ritual në Mekë të cilin, brenda mundësive,
e ka për detyrë ta bëjë çdo mysliman i mirë, të paktën një herë në jetë. Si çdo vit,
njofton agjencia Misna, një sistem vigan sigurie është në gatishmëri të plotë për
të garantuar që shtegtimi i madh (Hajji) të kremtohet pa aksidente, në një periudhë
tensionesh të veçanta në rajon. Sirianët, refugjatë në Jordani, Turqi e Liban u pajisen
me viza speciale, shoqëruar edhe me një ndihmë financiare, ndërsa autorizimet për
shtegtarët iranianë, sipas kanalit të internetit të Ministrisë së Brendshme të Riad
(الرياض), iu nënshtruan kufizimeve, për shkak të sigurisë. Shtegtarët iranianë
e dëshmojnë çdo vit fenë edhe përmes ritit, që njihet si “mohim i politeistëve”, rit
i krijuar nga Khomeini kundër Perëndimit e Izraelit. Për myslimanët e Republikës
Demokratike të Kongos e të Ugandës, këtë vit u arrit deri në atë pikë, sa të ndalohet
fare shtegtimi: të tepërta, sipas drejtuesve sauditë, rreziqet e infektimit me virusin
Ebola, që është dukur përsëri në dy vatra, në të dy vendet. Haxhiu, domethënë
shtegtari që ecën drejt Mekës, vishet me të bardha, simbol i pastërtisë dhe i barazisë
ndërmjet të gjithë njerëzve, që i nënshtrohen Zotit (në arabisht, ihram, siç quhet
në përgjithësi gjendja e pastërtisë, që duhet ta synojë çdo mysliman i mirë). Miliona
myslimanë e nisën shtegtimin, duke u ngjitur në Malin e Mëshirës, në Arafat, 19 kilometra
jashtë Mekës, ku besohet se Profeti shqiptoi predikimin e lamtumirës. Riti, që duhet
të zgjatë katër ditë, mbyllet me Eid al Adha, Festën e Flijimit. Drejtësia islamike
e lejon besimtarin, që pengohet për të qenë i pranishëm fizikisht, por ka mundësi
ekonomike, të delegojë ndonjë tjetër për kryerjen e këtij detyrimi fetar. Në këtë
rast, përfitimet shpirtërore shkojnë në dobi të atij, që paguan udhëtimin dhe shpenzimet
e tjera të zëvendësuesit. Në testament mund të lihen edhe fonde, që riti të kryhet
në emër e për shpëtimin e shpirtit të të vdekurit. Në shoqëritë islamike, ai që
shtegton kah Meka, gëzon respekt të veçantë. Ka të drejtë të përdorë një çallmë të
posaçme, që i kujton të gjithëve se ka qenë në Mekë dhe të quhet me emrin e nderuar
Haxhi(shtegtar). Monarkia saudite ka dërguar në vend 320 mjekë, 135. 000 vetë
të forcave të sigurisë e 1500 videokamera të vendosura rreth Xhamisë së Madhe, teatër
i fazës përfundimtare të shtegtimit. Çdo vit në kasat e Arabisë Saudite hyjnë 4 miliardë
euro, fryt i këtij rituali.