Benedikti XVI do të krijojë 6 kardinaj të rinj në Koncistorin e 24 nëntorit.
Gjatë Sinodit të Ipeshkvijve për Ungjillëzimin e Ri, Papa Benedikti XVI njoftoi se
më 24 nëntor, në vigjilje të Solemnitetit të Krishtit Mbret, do të mblidhet Koncistori
për krijimin e 6 kardinajve të rinj. Ata përfaqësojnë tre kontinente: Amerika, Afrika
e Azia. Janë imzot Xhejms Harvej, prefekt i Shtëpisë Papnore, që Papa dëshiron ta
emërojë kryeprift të Bazilikës Papnore të Shën Palit jashtë Mureve; Fortlumturia e
Tij, Bekara Butros Raji, patrik i Antiokisë së Maronitëve në Liban; Fortlumturia e
Tij, Bazelios Kleemis Totunkal, kryeipeshkëv i Trivandrumit të Siro-Malankarezëve
në Indi; imzot Xhon Olorunfemi Onajekan, kryeipeshkëv i Abuxhës në Nigeri; imzot Rubén
Salazar Gòmez, kryeipeshkëv i Bogotasë në Kolumbi; imzot Luis Antonio Tegëll, kryeipeshkëv
i Manilës në Filipine. Duke iu drejtuar të gjithë besimtarëve, Benedikti XVI
i porositi: “I ftoj të gjithë të luten për të zgjedhurit e rinj, duke kërkuar
ndërhyrjen amnore të së Lumes Mari Virgjër, që të dinë ta duan gjithmonë me guxim
e përkushtim Krishtin dhe Kishën e tij”. Por të dëgjojmë përshtypjet e para
të disa kardinajve. Ja ç’na tha kryeipeshkvi i Manilës, imzot Luis Antonio Tegëll: Nuk
jam i përgatitur për të pranuar këtë nder të madh nga Ati i Shenjtë! Është shenjë
besimi, por edhe përvojë shpirtërore. Kur Sekretari i Shtetit më thirri për të më
komunikuar vendimin e Papës, desha t’i përgjigjesha me fjalët e lutjes para Kungimit:
“nuk jam i denjë të marr pjesë në tryezën tënde…”. Mendimi im i parë qe për misionin
e Kishës në Filipine, në veçanti për Kishën e Manilës. Kjo Kishë ka detyra e impenjime
për të gjithë Azinë. Gjysma e të krishterëve aziatikë jetojnë në Filipine. Ndoshta,
kjo dhuratë që më bëhet, është për nxitjen e misionit të Kishës filipinase në ungjillëzimin
e Azisë. Ç’thonë njerëzit në Abuxha të Nigerisë, ku është kryeipeshkëv, imzot
Xhon Olorunfemi Onajekan? Lajmi u dha nga CNN e gjysëm ore pasi u njoftua në
Vatikan, të gjithë e dinin. Prandaj, s’pata nevojë t’i informoj. Të krishterë, myslimanë,
të gjithë thonë se ky është nder për vendin. Është lajm i mirë për Nigerinë, pas shumë
lajmeve të këqia. Shpresojmë të jetë shenjë e bekimit të Zotit për atdheun tonë. Ndërkaq,
patriku i Antiokisë së Maronitëve në Liban, Bekara Butros Raji është ndër kardinajtë
më të shqetësuar për situatën, në të cilën ndodhet vendi i tij: Gjendja është
vërtet shumë kritike për shkak të Sirisë: gjithçka ndikon mbi Libanin, sidomos fakti
që Siria po shkon drejt një konflikti edhe më të përgjakshëm ndërmjet sunitëve, që
janë shumica, dhe alauitëve, që janë pakica. Në Liban kemi si sunitë, ashtu edhe alauitë,
prandaj problemet siriane ndjehen edhe këtu. Përveç kësaj, libanezët janë të ndarë
ndërmjet tyre: sunitët janë kundër regjimit; shiitët, me regjimin. Konflikti është
me natyrë politike. Nëse do të mbetet brenda këtij kuadri, gjithçka do të kthehet
në normalitet, por nëse do të kalohet ky kufi gjendja do të degjenerojë. Gjithsesi,
besoj se jo.