സഹായധനവുമായി സിറിയയിലേയക്ക് പാപ്പായുടെ സമാധാന സംഘം
24 ഒക്ടോബര് 2012, വത്തിക്കാന് സിറിയയിലെ കലാപ ഭൂമിയിലേയ്ക്ക് ബനഡിക്ട് 16-ാമന്
പാപ്പ ആയയ്ക്കുന്ന സമാധാന സംഘം ഇനിയും വൈകുമെന്ന്, വത്തിക്കാന് സ്റ്റേറ്റ് സെക്രട്ടറി
കര്ദ്ദിനാള് തര്ച്ചീസിയോ ബര്ത്തോണെ അറിയിച്ചു. മതാന്തര സംവാദങ്ങള്ക്കായുള്ള പൊന്തിഫിക്കല്
കൗണ്സിലിന്റെ പ്രസിഡന്റ് കര്ദ്ദിനാള് ഷോണ് ലൂയി താവ്റാന്റെ നേതൃത്വത്തില് പാപ്പാ
നിയോഗിച്ച സിറിയയിലേയ്ക്കുള്ള വത്തിക്കാന്റെ 6-അംഗ സമാധാന സംഘം ഉടനെ പുറപ്പെടുമെന്ന്
അറിയിച്ചിരുന്നെങ്കിലും, രാഷ്ട്രീയ സ്ഥിതിഗതികളുടെ സങ്കീര്ണ്ണതമൂലം സന്ദര്ശനം ഇനിയും
വൈകുമെന്ന് വത്തിക്കാനില് നടക്കുന്ന സിനഡു സമ്മേളത്തില് ഒക്ടോബര് 23-ാം തിയതി ചൊവ്വാഴ്ച
രാവിലെ കര്ദ്ദിനാള് ബര്ത്തോണെ, അറിയിക്കുകയുണ്ടായി.
സീറിയയിലേയ്ക്ക് പുറപ്പെടാനുള്ള
സംഘത്തിലെ സിനഡു പ്രതിനിധികളുടെ സാങ്കേതിക തടസ്സവും സിറിയയിലേയ്ക്കുള്ള സമാധാന സംഘത്തിന്റെ
യാത്ര വൈകിക്കുന്നുണ്ടെന്നും കര്ദ്ദിനാള് ബര്ത്തോണെ ചൂണ്ടിക്കാട്ടി. ഒക്ടോബര് 28-ന്
സിനഡു സമ്മേളനം കഴിഞ്ഞാല് സമാധാന സംഘത്തിന് പുറപ്പെടാനാകുമെന്നു പ്രതീക്ഷിക്കുന്നുവെന്നും,
വേദനിക്കുന്ന സിറിയന് ജനതയോടുള്ള സഹാനുഭാവത്തിന്റെ പ്രതീകമായി പാപ്പാ നല്കുന്ന സഹായ
ധനത്തോടു ചേര്ത്ത് സിനഡു പിതാക്കന്മാരുടെ സംഭാവനയും സീറിയായില് എത്തിക്കുമെന്നും കര്ദ്ദിനാള്
ബര്ത്തോണെ പ്രസ്താവിച്ചു.