Іспанскі кардынал: мова новай евангелізацыі – гэта мова любові
Мовай новай евангелізацыі
павінна быць мова любові, бо толькі яна зразумелая ўсім. Такога меркавання прытрымліваецца
арцыбіскуп Барселоны, кардынал Луіс Марцінэс Сістах, удзельнік Сінода Біскупаў, які
праходзіць у Рыме. На думку іерарха, новая евангелізацыя з’яўляецца абсалютна неабходнай.
“Трэба выйсці з касцёлаў і ісці, туды дзе ёсць людзі. Неабходна навучыцца пазнаваць
сацыяльна-рэлігійны і культурны кантэкст нашага свету”, - сказаў кардынал. Паводле
іспанскага іерарха нягледзячы на моцную секулярызацыю, людзі не страцілі свае “рэлігійныя
пачуцці” і “знаходзяцца ў пошуку сэнсу жыцця”. Да іх неабходна звярнуцца з мовай любові,
таму што яна зразумелая усім, і таму што кожны хоча быць любімым і любіць.
Іерарх
адзначыў, што Касцёл павінен абвяшчаць Евангелле з двух прычын: па-першае з любові
да Езуса, які аддаў за людзей сваё жыццё, памёр на крыжы, дзеля збаўлення ўсіх. А
другая прычына: любоў да бліжніх. “Мы любім нашых братоў і хочам падзяліцца з імі
лепшым, з таго, што атрымалі: скарбам веры, скарбам збаўлення, якое нам даў Езус.
Таму мы хочам абвяшчаць Евангелле. Мы павінны рабіць гэта пераканаўча, каб тыя, хто
нас слухаюць маглі сказаць: “Гэтыя людзі па-сапраўднаму вераць і нават жывуць гэтым!”,
- адзначыў арцыбіскуп Барселоны.
Кардынал Сістах падкрэсліў, што зараз настаў
той час, калі многія задумаліся – а ці сапраўды рэлятывізм – гэта найлепшая дарога
для чалавецтва: “Ці сапраўды кожны можа рабіць толькі тое, што хоча? Ці не існуе пэўнага
парадку рэчаў. Куды вядзе ўсё гэта?” Паводле іерарха рэлятывіскі стыль мыслення прывёў
да эгаізму, індывідуалізму і пошуку ўласнага дабрабыту любым коштам. Доказам гэтага,
паводле яго, з’яўляецца эканамічны крызіс, які наступіў.