У Рыме прагучыць твор напісаны братам Бэнэдыкта XVI

Году веры прысвечаны ХІ міжнародны фестываль сакральнага мастацтва і музыкі. Ён пройдзе 2-13 лістапада ў рымскіх базыліках, пад патранажам фонду “Pro musica e arte sacra”. Сродкі ад правядзення мерапрыемства ў гэтым годзе пойдуць на рэстаўрацыю паўднёвай часткі каланады на плошчы св. Пятра і фантана на ёй. Кардынал Анжэла Камастры, які ўзначальвае фонд, лічыць, што вернікі, гэта тыя людзі, якія маюць гармонію ў душы. Менавіта яны, на думку іерарха, здольныя ствараць грамадства, якое можа ператварыцца ў “прыгожую мелодыю”, а Касцёл па сваёй сутнасці павінен быць тым, хто нясе гармонію ў свет. Кардынал Камастры паведаміў, што сем канцэртаў, якія выканаюць сусветна вядомыя хоры і аркестры , будуць цікавыя для самай шырокай аўдыторыі. Адметнасцю сёлетняга фестывалю будзе выкананне хорам Папскай Сікстынскай капэлы твору пад назвай “Missa Anno Santo”, аўтарам якога з’яўляецца брат Пантыфіка кс. Георг Ратцынгер.