16 кастрычніка, пасля
пасяджэння Сіноду Біскупаў, Бэнэдыкт XVI сустрэўся з Мітрапалітам Іларыёнам, старшынёй
Аддзела знешніх царкоўных сувязяў Маскоўскага Патрыярхату, які, дарэчы, выступіў з
прамовай на біскупскай асамблеі. Праваслаўны іерарх перадаў прывітанне Папе ад Патрыярха
Маскоўскага і ўсяе Русі Кірыла. У размове з Пантыфікам ён закрануў “шырокае кола пытанняў”.
Мітрапаліт падзяліўся сваімі ўражаннямі ад сустэчы Сінадальнай камісіі па біблійна-тэалагічных
даследаваннях, якая прайшла незадоўга да сустрэчы з Пантыфікам, выказаўшы “надзею
на развіццё адносін паміж Рускай Праваслаўнай Царквой і Рыма-каталіцкім Касцёлам у
галіне тэалагічных даследаванняў”. Мітрапаліт Іларыён у размове з Папам з занепакоеннасцю
распавёў аб “прафанацыі хрысціянскіх святынь у розных краінах”, у прыватнасці аб “акце
вандалізму, які адбыўся ў храме Хрыста Збаўцы”. “Папа Бэнэдыкт XVI, - паводле заявы
Патрыярхіі - выказаў сваю салідарнасць з Рускай Праваслаўнай Царквой па гэтым пытанні
і сваё здзіўленне рэакцыяй некаторых сродкаў масавай інфармацыі на гэты падзеі”. Мітрапаліт
Іларыён адзначыў, што “абарона хрысціянскага насельніцтва на Блізкім Усходзе і ў іншых
краінах, дзе яно сутыкаецца з дыскрымінацыяй і насіллем, з’яўляецца агульнай задачай
праваслаўных і католікаў”.