У бліжэйшую сераду
пастулятар беатыфікацыйнага працэсу папы Яна Паўла I (Альбіна Лучыані) біскуп Энрыка
Даль Ковала перадасць у Кангрэгацыю па справах Кананізацыі так званы “Positio” – падрабязную
дакументацыю аб жыцці і працы Слугі Божага, непасрэднага папярэдніка Яна Паўла II,
які кіраваў Касцёлам толькі 33 дні. З медыцынскіх дакументаў і паказанняў 167 сведкаў,
ясна, што не можа існаваць ніякіх сенсацыйных гіпотэз, што смерць Пантыфіка магла
быць вынікам дзеянняў трэціх асоб, заявіў у інтэрв’ю сайту “Tgcom24” рэктар Папскага
Латэранскага ўніверсітэту. 17 кастрычніка спаўняецца 100 гадоў з дня нараджэння Яна
Паўла І.
Біскуп Даль Ковала не ўтойвае, што сабраная ім дакументацыя ўтрымлівае
шэраг цікавых і раней невядомых фактаў. Ён прызнаўся таксама, што апісанне цуду праз
пасрэдніцтва Слугі Божага ўжо аддадзена ў Кангрэгацыю для медыцынскай і тэалагічнай
ацэнкі. На дадзеным этапе працэсу, аднак, не можна сказаць аб тэрміне яго заканчэння.
Біскуп-пастулятар падкрэслівае, што рашэнне тагачаснага Патрыярха Венецыі, прыняць
выбар калегіі кардыналаў, было гераічным учынкам на карысць Касцёла.