Thirrje për Malin në Sinod: në veri integralistët duan të imponojnë Sharinë.
Ndërsa Bashkimi Evropian shpreh shqetësimin e tij dhe mendon për një mision ushtarak
në Mali, kriza e rëndë, në vijim, në vendin e Afrikës perëndimore ishte në qendër
të lutjeve të Etërve sinodalë. Në mikrofonin tonë, imzot Jean-Baptiste Tiama,
ipeshkëv i Sikasso-s, kryetar i Konferencës ipeshkvnore të Malit:
Përgjigje:
- Në vendin tonë situata është vërtet dramatike. Nga viti 1992 e deri më sot kemi
jetuar në paqe e qetësi, por duke filluar nga janari i vitit 2012, jemi në kushtet
e sulmeve islamiste në Veri. E sot fanatikët islamikë kanë shtënë në dorë dy të tretat
e vendit e duan të imponojnë ligjin islamik. Kjo i dëmton rëndë fetë e tjera e jo
më pak, edhe laicitetin e shtetit. Ushtria, për fat të keq, nuk ka fuqi materiale
për t’i bërë ballë situatës. Prandaj kemi nevojë për ndihmë nga mbarë bota, për ta
përballuar këtë tension. E përsëris: kemi nevojë për ndihma nga mbarë bota, e sidomos,
nga OKB-ja.
Pyetje: - Si po e jeton Kisha gjithë këtë dramë, përkrah
popullatës, në një situatë kaq të vështirë?
Përgjigje: - Deri më sot
Kisha ka qenë gjithnjë përkrah njerëzve. Veprojmë përmes strukturave shoqërore: shkollave,
sidomos Karitasit, që bën shumë për zhvillimin e vendit. Kështu e ungjillëzojmë
atë 2,5% të të krishterëve, të pranishëm në vend, duke u përpjekur sidomos, të formojmë
laikë e meshtarë. Kemi një Seminar të madh, ku i formojmë meshtarët tanë, për t’i
dërguar, pastaj, si misionarë në të gjithë vendin tonë. Veriu i Malit banohet nga
një popullsi 100% myslimane. Të krishterët janë të pranishëm vetëm në Jug, ku numri
i tyre vjen gjithnjë duke u bërë më i madh. Jemi të kënaqur për këtë që bëjmë, duke
pasur parasysh se pagëzojmë vit për vit në kremtimin e Pashkëve. E kjo do të thotë
se njerëzit e pranojnë mesazhin e krishterë e kthehen në rrugën e Zotit.
Pyetje:
- Ky është ungjillëzimi në Mali, apo jo? Përgjigje: - Po, mund ta quajmë
kështu ungjillëzimin e ri në Mali. Më parë ishin misionarët, që vinin nga jashtë,
por tani ia dorëzuan Malin vetë banorëve. Këta po kërkojnë e po gjejnë mjete shpirtërore
e njerëzore për të vijuar ecjen në hullinë e ungjillëzimit, duke hapur brazdën e re!