Ոչ Եւս է Երուսաղէմի Հայոց Պատրիարք Ամենապատիւ Տ.Թորգոմ Արք. Մանուկեանը։

Ցաւով իմացանք մահուան գուժը՝ Երուսաղէմի Հայոց Պատրիարք Ամենապատիւ Տ.Թորգոմ Արք. Մանուկեանին ( 93 տարեկանին) ։
Ողբացեալը ծնած էր 16 փետրուար 1919-ին, Պաղտատի հիւսիսը գտնուող ՝ Բագուբայի փախստականներու ճամբարին մէջ: Պաղտատի Սրբոց Թարգմանչաց հայկական դպրոցի մէջ նախնական ուսումը աւարտելէ ետք՝ ընդունուած է Երուսաղէմի Հայոց Պատրիարքարանի Սրբոց Յակոբեանց ժառանգաւորաց վարժարան, զինք սարկաւագ ձեռնադրած է ՝ երջանկայիշատակ Թորգոմ արք. Գուշակեան, 2 օգոստոս 1936-ին, եւ 23 Յուլիս 1939-ին կուսակրօն քահանայ ձեռնադրուած է ստանալով Թորգոմ անունը:
Երուսաղէմի Հայոց Պատրիարքարանին մէջ վարած է տարբեր պաշտօններ 1939-46 թուականները աշխատած է Պատրիարքարանի «Սիոն» ամսագրի խմբագրութեան մէջ, ինչպէս նաև եղած է ճեմարանի փոխտեսուչ: Եղած է Ֆիլատելֆիա, Քեմպրիճ ու դարձեալ Երուսաղէմ... 1962-ին ընտրուած է Ամերիկայի Արևմտեան թեմի Հայոց առաջնորդ, նոյն տարւոյն հոկտեմբեր 14-ին, ձեռամբ երջ. Վազգէն Ա. Ամենայն Հայոց Կաթողիկոսին, Մայր Աթոռ Ս. Էջմիածնի մէջ եպիսկոպոս ձեռնադրուած է, ու 4 տարի ետք 1966-ին Վազգէն Ա Կաթողիկոս իրեն շնորհած է Արքութեան պատիւը:
1990-ի մարտ 22-ին ընտրուած է Երուսաղէմի 96-րդ Պատրիարք:
Թորգոմ Արք. Մանուկեան ստացած է շարք մը ակադեմական պարգևներ, արժանացած՝ Նիու Եորքի Ընդհանուր Աստվածաբանական Ճեմարանի պատուաւոր դոկտորի կոչման:
1986-ին ստացած է նաև Ամերիկայի երկու գլխաւոր պարգևները. «Ազատութեան Արձան» և «Էլիզ Այլընճ» պատուոյ շքանշանները:
Ան մեծ աւանդ ունեցած է միջազգային էքիւմենիք յարաբերութիւններու զարգացման գործին մէջ։ Ծառայած է ԱՄՆ-ի մէջ Քրիստոսի Եկեղեցիներու Ազգային Ժողովի յանձնաժողովին մէջ ու նախագահած «Կրօնը ամերիկեան կեանքին մէջ» խորհուրդը: Եղած է նաև «Խղճմտանքի կոչ» հիմնադրամի տնօրէններու խորհուրդի անդամ:
Երջանկայիշատակ՝ Թորգոմ Պատրիարքը հեղինակ է 20 մենագրութիւններու, որոնց թուին` բանաստեղծական երեք ժողովածուներ, հայկական Ս. Պատարագի ուսումնասիրութիւն, հայոց Մեծ Եղեռնին նուիրված գրքեր և Երուսաղէմի սուրբ վայրերու մանրամասն ուղեցոյց: Պատրիարք Հայրը ճանաչցուած է նաեւ որպէս կոմիտասագէտ:
Հանգուցեալ պատրիարքին յուղարկաւորութիւնը պիտի կատարուի կիրակի 14 հոկտեմբերի` Ս. Պատարագի աւարտին։
Ռատիովատիկանի հայերէն հաղորդումներու անձնակազմը իր ցաւակցութիւնները յայտնելով հայ եկեղեցւոյ ու հաւատացեալներուն, աղօթք կը բարձրացնէ առ Հայր որ հոգիի խաղաղութիւն պարգեւէ ննջեցեալ սպասաւորին ու զինք ընդունի իր Արքայութեան մէջ։ Յիշատակն արդարոյն օրհնութեամբ եղիցի: