Bruksel: Shqipërisë mund t’i jepet statusi i kandidatit për në Bashkimin Evropian,
me disa kushte
Komisioni Evropian “i rekomandon Këshillit t’i japë statusin e kandidatit” Shqipërisë,
por vetëm pasi Tirana të ketë përfunduar disa reforma të rëndësishme. Kështu lexohet
në bocën përfundimtare të raportit mbi zgjerimin, i cili u miratua sot në Bruksel. “Komisioni
Evropian – thuhet në tekst – do ta njoftojë Këshillin, sapo të jenë bërë përparimet
e nevojshme” në fushën e drejtësisë, të administrimit publik dhe të rishikimit të
normave në procedurat parlamentare. Në raportin për Këshillin e Evropës, ekzekutivi
i Brukselit nënvizon se do të marrë parasysh edhe luftën kundër korrupsionit dhe krimit
të organizuar, në një çast kur, si kurrë më parë, ky problem ndjehet nga të gjitha
shtresat e popullsisë. Komisioni do të japë “lejen” për fillimin e bisedimeve përfundimtare
të integrimit të Shqipërisë në Bashkimin Evropian vetëm kur Tirana të ketë vënë në
jetë impenjimet e marra dhe të ketë plotësuar reformat kyçe, për të cilat akoma ka
rrugë për të bërë. Prova më e rëndësishme për qeverinë e Berishës do të jenë zgjedhjet
parlamentare të vitit 2013, të cilat duhet të dëshmojnë dëshirën e të gjitha partive
për të respektuar ligjin e ri zgjedhor, për të dialoguar ndërmjet tyre e për të vazhduar
reformat. Akoma mbeten për t’u arritur disa standarte, si: përshtatja e normave të
fushatës zgjedhore me ato ndërkombëtare; forcimi i pavarësisë së institucioneve gjyqësore;
forcimi i hetimeve dhe i ndërhyrjes gjyqësore në luftën kundër korrupsionit dhe krimit
të organizuar; marrja e masave më të frytshme për mbrojtjen e të drejtave të njeriut
e për politikat kundër diskriminimit; zbatimi i së drejtës së pronësisë.