Sinodi: Imzot Dal Kovolo: feja e dashuria e krishterë nuk janë vetëm mësime teorike;
të rinjtë presin përgjigje konkrete.
“Të nxitet zhvillimi i një kulture me rrënjë më të thella në Ungjillin e Krishtit”.
Mund të përkufizohet kështu ungjillëzimi i ri. Është sfidë, që kërkon rrëmimin e ndërgjegjes
edhe në mënyrë akademiko-universitare. Mësuesi nuk mund të kënaqet vetëm duke transmetuar
mësimin, duhet edhe ta dëshmojë Lajmin e mirë. Kështu u shpreh në Sinod rektori i
Universitetit Papnor Lateranens, imzot Enriko Dal Kovolo:
Përgjigje:
- Teologjia dhe thellimi kulturor, duhen dëshmuar gjithnjë më shumë. Fjalët,
që përdori Papa në hapjen e Sinodit, ishin thellësisht domethënëse. Për të ungjillëzuar,
duhet të bashkëveprojnë me sukses dy kategori: dëshmimi i fesë dhe dashuria e krishterë.
Dëshmimi i fesë, siç e shpjegoi Papa, nuk është thjesht një seri mësimesh, që propozohen
e transmetohen. Por është gatishmëria për të hyrë në lojë, në dëshmi, deri në dhurimin
e plotë të vetë jetës. Ja pra ajo, që më intereson në mënyrë të posaçme: një teologji,
që jo vetëm mësohet, por edhe dëshmohet; një thellim kulturor, që nuk synon vetëm
tek përmbajtja, por arrin me fryt tek dëshmia e dashurisë së krishterë.
Pyetje:
- Atëherë, mund të thuhet se dëshmia dhe njohja e përmbajtjes nuk mund të jenë
dy realitete të ndara?
Përgjigje: - Sigurisht, ky është një
rrezik, me të cilin ndeshem çdo ditë. Mendoj se është një lloj deformimi profesional,
i cili vërehet tek ne, teologët, që japim mësim: ia besojmë tepër mesazhin tonë përmbajtjes
së mësimit, duke rrezikuar ta harrojmë dëshminë personale, që duhet të japim. Mendojmë:
dëshmimi nuk i përket profesionit tim! Por nuk është kështu! Në se kujtojmë dëshminë
e Etërve të Kishës, e kuptojmë menjëherë, e shumë mirë, se Ati i Kishës është, mbi
të gjitha, Shenjt. E në se nuk është Shenjt, nuk mund të jetë as Atë.
Pyetje:
- Ku duhet kërkuar shkaku, që i shtyn të rinjtë e sotëm të largohen nga feja?
Përgjigje:
- Besoj se është një fenomen kulturor, i cili lidhet me përvojën, jetuar
nga të rinjtë në familjet, që nuk e dëshmojnë më mesazhin e krishterë. Nuk flasim
për shkollën, që rrezikohet të mos jetë më mjedis edukativ, siç duhet të jetë, e aq
më pak, shembull, që i jepet edhe botës së politikës. Nuk funksionon konteksti e,
prej këndej, të rinjtë nuk arrijnë të apasionohen nga mesazhi i krishterë. Nga ana
tjetër, ka edhe grupe të rinjsh, që dinë të japin dëshmi shumë të guximshme në situata
të ndryshme historike. Por, kujdes, flasim ende për një pakicë.
Pyetje
- Nevoja për Zotin është e shkruar në zemrën e njeriut e, natyrisht, dhe në zemrën
e të rinjve...
Përgjigje: - Sigurisht, është pikërisht kështu.
I riu nuk mund të mos e kërkojë Zotin: ndoshta nuk di si ta kërkojë, gabon objektiv,
por kjo dëshirë është e shkruar në zemrën e tij. Sfida jonë, impenjimi ynë, duhet
të jetë ta kuptojmë këtë kërkim të së vërtetës dhe të qëllimit të jetës, që zë vend
tejet të rëndësishëm në zemrat e të rinjve.