Do të paraqitet në Panairin e Gjermanisë, libri i Papës për fëmijërinë e Jezusit
Shtëpia Botuese italiane “Rizzoli” do të paraqesë nga 10 deri më 14 tetor, në Panairin
ndërkombëtar të librit në Frankfurt të Gjermanisë, librin e ri të Papës Benedikti
XVI mbi fëmijërinë e Jezusit, sipas Ungjijve. Janë në zhvillim e sipër bisedime për
përkthimin e librit në 20 gjuhë dhe për shitjen e tij në 32 vende. Në Itali, vëllimi
do të dalë para Krishtlindjes, në bashkëpunim me Shtëpinë Botuese të Vatikanit. I
thjeshtë në gjuhën e përdorur, por rigoroz dhe i guximshëm në paraqitje, “Fëmijëria
e Jezusit” plotëson trilogjinë e shkruar nga Jozef Racinger, e mirënjohur me titullin
“Jezusi i Nazaretit”. Në këtë vëllim, që sipas analistëve është i destinuar të zgjojë
debate e diskutime teologjike, Papa shqyrton tekstet ungjillore dhe e fton lexuesin
t’i bëjë vetes pyetjet: “A është e vërtetë, ç’thonë Ungjijtë? Ka të bëjë me mua? E
nëse po, si, në ç’mënyrë?” Janë pyetjet me të cilat hapet libri, që na kujtojnë
atë të Pilatit për Jezusin: “Ti, nga vjen?” Është pyetja që e shoqëron njeriun e çdo
brezi, po ajo që bënë dijetarët e Lindjes, Mbretërit dijetarë, që shqyrtonin yjet
e që e paraqesin kaq mirë shqetësimin e zemrës njerëzore në kërkim të së vërtetës,
e vetmja që çon drejt gëzimit të thellë. Në Ungjijtë e fëmijërisë së Jezusit,
Benedikti XVI gjen rrënjët teologjike të gëzimit, që i përshkruan mrekullisht bukur;
gjen atë gëzim, që na thotë se Ungjilli nuk është histori e së kaluarës, por e së
tashmes, i flet njeriut bashkohor. E ndërsa Ati i Shenjtë e çon lexuesin në faqet
ungjillore të Lajmërimit të Zojës, të Lindjes së Jezusit e të vizitës së Mbretërve
Dijetarë, ja ku arrin e tashmja: analiza e atyre faqeve flet për të sotmen. Sot, edhe
ne, si Mbretërit Dijetarë, gjunjëzohemi para Foshnjës Hyjnore e Nënës së Tij, pyesim
veten ç’kuptim ka ky takim e çuditemi si një grua mund ta pranojë Zotin, duke i besuar
plotësisht Atij. Ndërsa afrohet Krishtlindja, ky libër tregon gëzimin për Lindjen
e Jezusit. Për atë që beson, është nxitje për të shqyrtuar deri në fund arsyet e fesë.
Njëkohësisht, Jozef Racinger flet me përzemërsi me të gjithë ata, që si Mbretërit
Dijetarë, janë në kërkim e me zemër të trazuar, pyesin: “Po Jezusi, nga vjen?”. Dy
vëllimet e para të trilogjisë “Jezusi i Nazaretit” janë “Nga Pagëzimi deri tek Shndërrimi”,
botuar në vitin 2007, dhe “Nga hyrja në Jeruzalem deri në ringjallje”, botuar në vitin
2011.