Papa hapi Sinodin kushtuar ungjillëzimit të ri. Në Engjëllin e Tënzot, ftesa për ta
rizbuluar Rruzaren në Vitin e Fesë.
“Të inkurajojë rizbulimin e fesë, që ngjall shpresë në jetën e çdo njeriu”: kështu
e përkufizoi Benedikti XVI qëllimin e ungjillëzimit të ri. Dje paradite, në Sheshin
e Shën Pjetrit, Papa kryesoi Meshën e hapjes së Sinodit të 13-të të përgjithshëm të
zakonshëm, kushtuar temës “Ungjillëzimi i ri për transmetimin e fesë së krishterë”,
që do të vijojë në Vatikan deri më 28 tetor. Gjatë homelisë, Benedikti XVI kujtoi
edhe vlerën e martesës, sot në krizë të thellë, si dhe të shenjtërisë, pa të cilën
nuk mund të flitet për ungjillëzim. Papa shpalli edhe dy dijetarë të Kishës: Shën
Gjonin e Avilës dhe Shën Hildegardën e Bingenit.
Ishte plot gjallëri dje, Sheshi
i Shën Pjetrit. Një turmë vigane, ardhur nga të katër anët e botës, e përshëndeti
hapjen zyrtare të Sinodit të 13-të të ipeshkvijve, kushtuar ungjillëzimit të ri a,
siç u shpreh Papa, “orientimit programatik për jetën e Kishës, të familjeve, të bashkësisë”,
me brohoritje e shpalosje flamujsh shumëngjyrësh të kombeve, ku rreh zemra e Kishës.
Më se 400, bashkëkremtuesit që, së bashku me Benediktin XVI, ripohuan me forcë: “Kisha
ekziston për të ungjillëzuar”. “Ungjillëzimi, në çdo kohë e në çdo vend, ka
pasur si pikë qëndrore e skajore, Jezu Krishtin, Birin e Hyjit; i Kryqëzuari është
shenja kryesore dalluese për të gjithë ata, që kumtojnë Ungjillin; shenjë dashurie
e paqeje, thirrje për kthim në rrugën e Zotit, ftesë për pajtim”. Ungjillëzimi
i ri, shpjegoi Papa, ka në qendër të vëmendjes, në radhë të parë, të pagëzuarit, që
janë larguar nga Kisha dhe jetojnë larg praktikimit të fesë së tyre të krishterë: “Bashkësia
sinodale, hapur sot, i kushtohet këtij ungjillëzimi, për t’i ndihmuar këta njerëz
të ritakohen me Zotin, i vetmi që e mbush me kuptim të thellë e paqe jetën tonë; për
t’i ndihmuar ta rizbulojnë fenë, gurrë Hiri, që çon gëzim e shpresë në jetën personale,
familjare, shoqërore”. Duke marrë, pastaj, shtytjen nga Ungjilli i djeshëm,
Benedikti XVI vuri theksin mbi realitetin, tashmë të njohur nga të gjithë, por jo
edhe të vlerësuar në masën e duhur, të martesës së burrit me gruan e cila, në vetvete,
është Ungjill, është lajm i mirë për botën e sotme, posaçërisht për atë të çkristianizuarën: “Bashkimi
i burrit me gruan, shkrirja e tyre në një korp të vetëm, në dashurinë frytdhënëse
e të pazgjidhshme, është shenjë, që flet vetë, me forcë, për Zotin, tejet e domosdoshme
në ditë tona kur, për fat të keq e për një mori arsyesh, në zonat e ungjillëzimit
të lashtë, martesa po kalon një krizë të thellë”. Martesa lidhet ngushtë me
fenë, jo në kuptimin e përgjithshëm të fjalës, vijoi Papa, por në kuptimin e bashkimit,
të bazuar mbi dashurinë e në atë të lidhjes së pazgjidhshme: “Është i dukshëm
përkimi ndërmjet krizës së fesë e krizës së martesës. E, siç pohon e dëshmon prej
kohe Kisha, martesa duhet të jetë jo vetëm objekt, por edhe, e sidomos, subjekt i
ungjillëzimit të ri”. Më pas Papa foli për dy Dijetarët e rinj të Kishës:
spanjollin Shën Gjoni i Avilës, që jetoi në shekullin XVI dhe gjermanen Hildegarda
e Bingenit, grua me inteligjencë të jashtëzakonshme, e aftë për t’i dalluar mirë shenjat
e kohës. Këta e të gjithë shenjtorët, tha Papa, janë protagonistët e vërtetë të ungjillëzimit
e edhe nismëtarë, që i hapin rrugën ungjillëzimit të ri. “Shenjtëria nuk njeh
kufij kulturorë, shoqërorë, politikë, fetarë. Ajo flet me gjuhën e dashurisë e të
vërtetësisë, që kuptohet nga të gjithë njerëzit vullnetmirë dhe i afron pranë Jezu
Krishtit, burim i pashterrshëm i jetës së re”. Por shenjtorët, vijoi Papa,
na mësojnë edhe se të krishterët mund ta rifitojnë dinjitetin e tyre si Bij të Zotit,
vetëm përmes pastrimit të thellë shpirtëror: “Në se i ngulim sytë mbi idealin
e jetës së krishterë, shprehur në thirrjen për shenjtëri, nuk mund të mos e shikojmë
me përvujtëri brishtësinë e shumë të krishterëve, madje mëkatin e tyre, personal e
komunitar, që përbën një pengesë serioze për ungjillëzimin, e të mos e pranojmë forcën
e Zotit që, në fe, takon ligështinë njerëzore. Prandaj nuk mund të flitet për ungjillëzimin
e ri, pa gatishmërinë e sinqertë për t’u kthyer në rrugën e Zotit”. Së fundi,
Papa kujtoi të Lumin Gjon Pali II, papnia e gjatë e të cilit mbetet shembull i shkëlqyer
i ungjillëzimit të ri.
Në lutjen e Engjëllit të Tënzot, pastaj, Ati
i Shenjtë u bashkua shpirtërisht me shenjtëroren e Pompeit, prej nga iu lartua përsëri
lutja Virgjërës Mari. Prej këndej, ftesa drejtuar besimtarëve të krishterë për ta
thënë sa më shpesh Rruzaren, vetëm, në familje e në bashkësi: “Do të dëshiroja
t’u propozoj të gjithëve ta rivlerësojnë Rruzaren në Vitin e ardhshëm të Fesë. Përmes
Rruzares, e lëmë Zojën e Bekuar, model i besimit, të na prijë, në sa meditojmë misteret
e Krishtit e, ditë pas dite, thellohemi në përvetësimin e Ungjillit, që i jep formë
gjithë jetës sonë”. Gjatë përshëndetjeve në gjuhë të ndryshme, në fund, Benedikti
XVI i ftoi besimtarët të luten për Sinodin, t’i lypin përvujtërisht Zotit hirin që
çdo i krishterë të përtërihet e ta njohë përgjegjësinë që ka për ta bërë të njohur
Shëlbuesin dhe mesazhin e tij të dashurisë e të paqes.