Kardinali Uërl në Sinod: të krishterët nuk duhet të kenë turp të kumtojnë Ungjillin
e Krishtit
Menjëherë pas ndërhyrjes së Papës në Sinod, punimet vazhduan me relacione të ndryshme,
me përshëndetjen e presidentit të deleguar, kardinalit Xhon Tong Hon, ipeshkvit të
Hong Kongut, ndjekur nga sekretari i përgjithshëm i Sinodit, imzot Nikola Eteroviç.
Më pas, iu la vend “Relacionit para diskutimit” paraqitur nga kardinali Donald Uërl,
kryeipeshkëv i Uashingtonit. Të ndjekim informacionin e korrespondentes së Radio
Vatikanit në Sallën e Sinodit, Isabella Piro: Ishin fjalë, që tundën muret,
ato që ipeshkvi i Hong Kongut u drejtoi etërve sinodalë: kujtoi frikën nga regjimi
komunist, përjetuar nga shumë familje të dioqezës, para se qyteti t’i aneksohej Kinës,
në vitin 1997. Por pikërisht kjo krizë, e kuptuar si mundësi e re, solli shumë katolikë
në Kishë, në kërkim të mbështetjes shpirtërore. Në Pashkët e kaluara, u pagëzuan 3
mijë të rritur. Pastaj, kardinali Tong Hon kujton tre parimet bazë të ungjillëzimit:
bashkimi me Zotin dhe me njerëzit, në veçanti, me të varfërit; shërbimi, i kuptuar
si dhurim i vetvetes dhe; doktrina, ose ai takim personal me Krishtin, që na bën dëshmitarë
të Tij: “Duhet të jemi dëshmitarë të zellshëm të fesë”. Nga ana e tij,
imzot Eteroviç përshkoi rrugën përgatitore të Sinodit të 13-të të përgjithshëm të
ipeshkvijve, i pesti, i thirrur nga Papa Benedikti XVI në tetë vjetët e papnisë së
tij. 90% e Kishave lokale kanë kontribuar në hartimin e dokumentit të punës (Instrumentum
Laboris), duke i dhënë sinodit një kolegjialitet të paparë. Edhe tema e ungjillëzimit
u zgjodh nga Ati i Shenjtë ndër tri tema, të propozuara nga ipeshkvijtë. Më pas,
fjala i kaloi kardinalit Uërl, i cili me “Relacionin para diskutimit”, shqiptuar në
latinisht, plot pasion, vuri në dukje kontekstin e vështirë të ungjillëzimit të ri
në shoqërinë bashkohore, theksoi se ekziston “një ndarje intelektuale dhe ideologjike
e Krishtit nga Kisha e vet”; se “barriera e individualizmit” bën që njerëzit të mos
marrin përsipër përgjegjësitë për të tjerët; se racionalizmi e shndërron fenë në “çështje
personale”, me pasojë mospraktikimin e saj nga të pagëzuarit. Kjo gjendje, vazhdoi
kardinali Uërl, i ka rrënjët në vitet ’70-’80, kur katekizmi ishte i pakët e jo i
vazhdueshëm dhe kur u vërejtën devijime në praktikën liturgjike. “Duket sikur një
tsunami me ndikim shekullor ka marrë me vete tregues të shoqërisë si martesa, familja,
koncepti i së mirës së përbashkët dhe dallimi ndërmjet së mirës e së keqes”. E jo
vetëm kaq: “mëkatet e pak vetëve” ushqejnë mosbesimin në strukturat e Kishës, ngriti
zërin kardinali. Pas kësaj analize të pamëshirshme, kardinali Uërl vuri në dukje
edhe elementet pozitive, që nuk mungojnë në shoqëri. Bartësja e tyre është familja,
model e vatër e ungjillëzimit të ri, element themelor i bashkësisë, shpesh e nënvlerësuar
dhe e përqeshur nga shoqëria bashkohore. Pikërisht mbi të duhet bazuar kumtimi i Ungjillit
e, nëse misionarët e dikurshëm kanë kapërcyer distanca të jashtëzakonshme gjeografike
për këtë, nënvizoi kryeipeshkvi i Uashingtonit, misionarët e sotëm duhet të kapërcejnë
distanca ideologjike po aq të jashtëzakonshme, pa pasur nevojë të dalin as nga lagjja. “Ungjillëzimi
i ri – theksoi kardinali – nuk është program. Është një mënyrë e re mendimi, shikimi
e veprimi. Është si një xham zmadhues, përmes të cilit shohim mundësitë e shpalljes
së re të Ungjillit”. Por është e nevojshme që të krishterët ta kapërcejnë sindromën
e turpit në kumtimin e Fjalës së Zotit, duke i treguar botës pa frikë se miqësia me
Jezusin është një thesar i thjeshtë, i pastër dhe i prekshëm, të cilin ata duhet të
jenë në gjendje ta dëshmojnë me jetë. Tri janë, sipas kardinalit Uërl, themelet e
ungjillëzimit: ai antropologjik, që pohon se çdo njeri është krijuar në përngjasim
e në shembëlltyrë me Zotin dhe ka brenda vetes dëshirën e natyrshme për t’u bashkuar
me hyjnoren; ai kristologjik, sipas të cilit Krishti na është zbuluar e nuk është
ndonjë krijim sociologjik, apo ndonjë devijim teologjik; dhe së fundi, themeli kishtar,
që sjell shëlbimin e Krishtit përmes e brenda Kishës së Tij. Ungjillëzuesi i
sotëm, përfundoi kryeipeshkvi i Uashingtonit, duhet të jetë i guximshëm, me atë “guxim
paqësor” karakteristik për shën Maksimilian Kolben, ose për Nënë Terezën; të jetë
në bashkim me Kishën e solidar me barinjtë e saj; ta kumtojë me gëzim mesazhin e Zotit;
ta ndjejë urgjencën e këtij misioni “shumë të rëndësishëm” për të cilin “nuk duhet
humbur kohë”.