Թուրքիոյ Խորհրդարանը Կառավարութիւնը ՝՝Լիազօրեց՝՝ Սուրիոյ Մէջ Զինուորական Գործողութիւններու
Ձեռնարկելու։
Թուրքիոյ խորհրդարանը երէկ վաւերացուց կառավարութեան դիմումը, որ վերջինիս կը լիազօրէ
անհրաժեշտութեան պարագային Թուրքիոյ սահմանէն դուրս զինուորական գործողութիւններ կատարելու: Խորհրդարանը
այդպիսով կառավարութեան լիազօրութիւն տուած կ՛ըլլայ «սուրիական բանակին կատարած յարձակումներու
առնչութեամբ զինուորական յարմար որոշում մը տալու»: Թուրքիոյ իշխող Արդարութիւն եւ
Բարգաւաճում կուսակցութենէն եւ ընդդիմադիր Ազգայնական Շարժում կուսակցութենէն 320 երեսփոխաններ
դիմումին թեր քուէարկեցին, իսկ ընդդիմադիր Հանրապետական Ժողովուրդի կուսակցութենէն եւ
Քրտական Խաղաղութիւն եւ ժողովրդավարութիւն կուսակցութենէն 129 երեսփոխաններ` դէմ: Որոշումի
որդեգրումէն ետք Թուրքիոյ փոխ-վարչապետ Պէշիր Աթալայ յայտարարեց, որ խորհրդարանին վաւերացուցած
փաստաթուղթը «որեւէ պետութեան կամ կողմի դէմ պատերազմ յայտարարելու լիազօրութիւն չէ»: