Intervistë me drejtuesin e Kongregatës Universale të Shtëpisë së Shenjtë, në prag
të vizitës së Benediktit XVI në Loreto
Të enjten, më 4 tetor, 50 vjet pas vizitës së Papës Gjoni XXIII, Benedikti XVI do
të shkojë në Loreto. Ati i Shenjtë do të vizitojë shenjtëroren e Shtëpisë së Shenjtë
për t’ia besuar Zojës kremtimin e Vitit të Fesë dhe Sinodin e ipeshkvijve për Ungjillëzimin
e Ri, që përurohet të dielën. Por ç’është Shtëpia e Shenjtë e Loretos? Sipas traditës,
e cila sot provohet nga kërkimet historike e arkeologjike, ajo është shtëpia ku është
lindur e rritur shën Maria. Por cilat janë këto prova? Të dëgjojmë drejtuesin e Kongregatës
Universale të Shtëpisë së Shenjtë, atë Xhuzepe Santareli: Janë sidomos
elementet me karakter arkeologjik, ato që i identifikojnë gurët e shtëpisë së Loretos,
si gurë, që vijnë nga Nazareti, si përsa i përket punimit të jashtëm me stil nabatean
- siç e shohim në Palestinë, futur nga Nabatejtë e Petrës – ashtu edhe për rreth 50
mbishkrimet judeo-kristiane, që mund të lexohen në gurët e Shtëpisë së Shenjtë. Në
veçanti, njëri, në greqisht, por me shkronja hebraike, mund të shpjegohet vetëm nëse
gurët vijnë nga Nazareti e janë gdhendur me mbishkrime pikërisht nga judejtë e krishterë.
Pastaj, siç na thotë tradita, kanë ardhur këtu në vitet 1291-94, gjatë mbartjes së
Shtëpisë së Shenjtë. Janë elemente objektive, që vështirë se mund të kundërshtohen. Është
mrekulli, që ka ardhur deri në kohët tona, e ruajtur përsosurisht… Po, e përsosur.
Në Nazaret, Shtëpia e Shenjtë ruhej nën një kishë me stil sinagoge, ndërtuar nga judejtë
e krishterë rreth fundit të shekullit të dytë e fillimit të të tretit. Pastaj është
ruajtur nën një kishë bizantine, nën një bazilikë e, në kohën e kryqëzatave, ndërmjet
shekujve XI dhe XII, në kriptën e një bazilike kryqtarësh shumë të bukur. Pra, sado
e brishtë të ketë qenë ndërtesa, ka sfiduar shekujt, pasi është ruajtur gjithnjë brenda
një ndërtese tjetër, prandaj nuk është prishur nga erozioni e agjentët e tjerë atmosferikë.
Edhe në Loreto u bë kështu, pasi u mbrojt menjëherë me një mur të madh e më pas u
mbrojt nga një kishë e parë e fundit të viteve ‘300 e pastaj nga bazilika aktuale,
e ndërtuar në vitin 1469, me projekt ndoshta të Françesko di Xhorxho Martini, një
arkitekt i shquar toskan, që ka jetuar ndërmjet shekullit XV dhe XVI. Çfarë
bëni ju fretërit e Loretos për ta nxitur përshpirtërinë mariane? Kemi rektoratin
dhe rektorin, që koordinon gjithçka; kemi sakrestinë për meshtarët, që kremtojnë;
kemi rojtarinë, që pret shtegtarët, të cilët vijnë në Shtëpinë e Shenjtë; kemi kongregatën
e Shtëpisë së Shenjtë, që promovon kultin marian lauretan me një ekip bashkëpunëtorësh
e sidomos; kemi penitencierët, që presin pendestarët nga çdo anë e botës, në gjuhë
të ndryshme. Natyrisht, Kongregata Universale e Shtëpisë së Shenjtë dhe arkivi i saj
promovojnë shumë botime me karakter shkencor, të përshpirtshëm, popullor, me qëllim
që të njihet shenjtërorja, historia dhe arti i saj, sepse shenjtërorja e Loretos është
më e pasur me vepra arti se të gjitha shenjtëroret mariane në botë.