Кардынал Рыкар: Францыя губляе свае хрысціянскія карані
Кардынал Жан-П’ер
Рыкар, арцыбіскуп Бардо 27 верасня ў пасольстве Францыі пры Апостальскай Сталіцы адкрыў
цыкл канферэнцый, прысвечаных актуальнай рэлігійнай сітуацыі ў яго краіне. У сваёй
кароткай прамове іерарх адзначыў, што існуе форма секулярызацыі, якая не адносіцца
да катэгорыі ідэалагічнай барацьбы, але праяўляецца ў палітыцы і спрыяе поўнай адмене
рэлігійнай свабоды ў жыцці грамадства. “Мы бачым некаторыя змены ў менталітэце, звязаныя
з секулярызацыяй нашага грамадства. Я маю на ўвазе працэс адыходу нашага грамадства
ад сваіх хрысціянскіх каранёў, асабліва ад адносінаў з Каталіцкім Касцёлам”, - сказаў
французскі іерарх. На яго думку, гэта не абавязкова варожасць або адкрытая барацьба
з ім, але невуцтва і абыякавасць. “Акрамя таго, некаторыя людзі зусім не ведаюць пра
свет рэлігіі або маюць традыцыю, адрозную ад каталіцкай , якая і стварыла гісторыю
нашай краіны”, - заявіў французскі кардынал Рыкар.
Ён таксама адзначыў, што
зараз у Францыі існуюць ваяўнічыя накірункі, якія імкнуцца скінуць рэлігію да сферы
прыватнага і ўнутранага жыцця і забараніць любыя формы яе выразу ў публічнай прасторы.
“Мы бачым праявы секулярызацыі ў рэакцыі на выказванні прадстаўнікоў Касцёла, асабліва
ў пытаннях палітычнага і грамадскага жыцця краіны”, - адзначыў кардынал Рыкар.