"Më parë njeriu se e vërteta!". Të nderuar miq ja përsëri në takimin tonë javor
me Fjalën e Zotit të së dielës. Kësaj herët do të dëgjojmë e meditojmë së bashku leximet
biblike të Liturgjisë Hyjnore të dielës së 26-të gjatë vitit kishtar, ciklit të dytë,
sipas kalendarit liturgjik të Kishës. Me këtë të diele kalojmë nga shtatori në
muajin tetor, të cilin Kisha në mënyrë të posaçme ia kushton nderimit të Shenjtënueshmes
Mari Virgjër e Misioneve. Përmes Ungjillit të kësaj së diele, Jezusi vijon mësimi
i tij mbi atë që duhet të karakterizon jetën e bashkësisë së tij, e të çdo bashkësie
që vërtetë don të quhet dhe të jetë e krishterë. Pas thirrjes për të marrë mbi
vete kryqin çdo ditë e për t’u bërë, më përvujtëri, shërbëtor i të gjithëve, në pjesën
ungjillore të kësaj së diele, Jezusi na mëson se si bashkësia e tij duhet ta ketë
zemrën e hapur për të pritur e për të pranuar të mirën kudo ajo lulëzon e nga kushdo
që bëhet, sepse e mira nuk është pronë ekskluzive e një grupi apo ndonjë tjetri; e
kësaj apo asaj Kishe apo bashkësie të veçantë. E mira është e Zotit dhe vetëm Zoti
e ka të drejtën e autorësinë mbi të mirën, kudo e nga kushdo që ajo bëhet. Dashuria
për të dalluar e njohur në fytyrën e çdo njeriu vet fytyrën e Zotit, dhe radikalitetin
për të ecur gjurmëve të ungjillit; një radikalitet kaq të nevojshëm që shërben për
të përforcuar në fe të krishterët e ligshtë e të paqëndrueshëm e të luhatshëm. Pra,
zemra e hapur; dashuria; radikaliteti ungjillor: janë një projekt që nuk realizohet
kurrë njëherë e përgjithmonë por lypet realizuar kurdoherë me ndihmën e Zotin. Për
këtë të kërkojmë me lutje mbështetjen dhe hirin e tij Hyjnor. Ekziston ndër njerëz
e madje edhe në besimtarë tundimi i monopolizimit të Zotit Kush është Zoti i vërtetë,
a mund ta shtrembërojë njeriu imazhin e tij të vërtetë? Janë këto pyetjet dhe drita
që liturgjia e kësaj të diele dëshiron të na japë. Shpirti i Zotit vepron lirisht,
ai mund të nxjerrë bij të Abrahamit edhe nga gurët, zëri i tij mund të dëgjohet dhe
të bëjë të dëgjohet nga njerëz dhe mjete njerëzore të paparashikuara dhe të pamenduara.
Zoti është i lirë në dhënien e dhuratave të tij, duke vepruar përtej skemave mendore
dhe strukturave të ngurtësuara, duke e lejuar profecinë edhe jashtë “tendës”. Leximi
i parë nga Libri i Numrave na paraqet zemërimin e Jozuehut, i cili duke parë se Shpirti
i Zotit shkon përtej kufijve të ngurtë të rendit të shtatëdhjetë pleqve, i drejtohet
Moisiut me kërkesën e tij integraliste “Ndaloji!”. Përballë këtij këndvështrimi të
shërbesës së shpëtimit si zotërim dhe privilegj, Moisiu i përgjigjet duke kremtuar
shkëlqimin e lirisë dhe të bujarisë së Perëndisë. Ky është edhe qëndrimi i Jezusit
në ungjillin e Markut. Ai i fton dishepujt e tij të respektojnë dhe të presin me besim,
duke parë në ata “që nuk janë të tanët” jo një armik ose konkurrues, por një sintoni
të brendshme që mund t’i shndërrojë në miq dhe bashkërrugëtues të besimit. Jezusi
i fton dishepujt e tij të ekzaminojnë sjelljen e tyre shoqërore (këmba dhe dora) dhe
personale (syri) për të shmangur që siguria e krenarisë vetjake të kthehet në një
rrënjë ligësie për vëllezërit që janë ende në kërkim të Zotit. Institucionet janë
nisëm e Zotit, por është e rëndësishme edhe përdorimi i tyre. Profetët nuk pushojnë
së kujtuari se Hyji është i lirë në mënyrë sovrane. Ai mund të heqë dorë nga tempulli,
nëse ai nuk i shërben adhurimit të tij, mbretëria e Davidit mund të mbarojë, nëse
mbretërit nuk i shërbejnë atij. Zoti Jahve mund të arrijë edhe të dëshirojë tejkalimin
e kufijve të ngurtë të popullit të Izraelit. Edhe Krishti i përdor institucionet
fetare të kohës së tij, por me liri dhe duke i tejkaluar ato. Shpirti fryn aty ku
dëshiron dhe nuk është i lidhur nga asnjë strukturë njerëzore. Tundimi i përhershëm
i besimtarit është ajo e “sekuestrimit” të Zotit, e monopolizimit, duke e mbyllur
Zotin në siguritë vetjake, duke e ezauruar atë në strukturat dhe institucionet tona. Për
ne atëherë bëhet urgjente nevoja njohjes dhe e pranimit të përtejshmërisë së Zotit
dhe lirisë së tij, e kërkimit të vullnetit të tij në jetën tonë të përditshme. E kishte
kuptuar më së mirë Shën Tereza e Lisieux-së, të cilën Kisha e përkujton sot, e kuptojnë
të gjithë ata besimtarë që nuk pretendojnë ta bëjnë Zotin pjesë të skemave të tyre
mendore, por qëndrojnë në kundrimin magjepsës të përtejshmërisë dhe të lirisë së tij,
që është burim shpëtimi për të gjithë. Për këtë arsye kremtojmë eukaristinë e ditës
së diel, për këtë arsye edhe për ne besimtarë të këtij çasti historik, eukaristia
kthehet në një përvojë çliruese dhe hiri, për t’u mbushur dhe për të bërë të tonën
mendësinë dhe këndvështrimin e Zotit të vdekur dhe të ngjallur për shpëtimin tonë. “Edhe
nga krenaria shpëtoje shërbëtorin tënd o Zot që të mos ketë pushtet mbi mua. Atëherë
do të jem i panjollë, do të jem i pastër nga mëkati” (Ps. 18/19) Liturgjia
e Fjalës së Zotit
Leximi I Num 11,25-29 Dy burra që nuk i përkisnin
grupit të të shtatëdhjetëve të zgjedhur nga Moisiu, marrin Shpirtin e profecisë.
Për këtë arsye Jozuehu është xheloz për ta dhe i kërkon Moisiut t’i ndalojë që të
profetizojnë. Shpirti i Hyjit fryn aty ku do. Është e nevojshme të dimë të njohim
veprimin e tij dhe të pranojmë me përvujtëri ndërhyrjet e tij kudo që të shfaqen.
Lexim prej Librit të Numrave (11,25-29)
Në ato ditë, Zoti zbriti
në re dhe zuri të bisedojë me Moisiun. Nga shpirti që ishte në Moisiun mori dhe u
dha shtatëdhjetë burrave pleq. Kur Shpirti pushoi mbi ta, filluan të profetizojnë,
por këtë nuk e bënë askurrë më. Porse dy pleq ndenjën në tëbanishtë. Njëri quhej Eldad
e tjetri Medad. Edhe mbi ta pushoi Shpirti. Edhe këta ishin shënuar, por nuk erdhën
te tenda. Kur filluan të profetizojnë në tëbanishtë, vrapoi një djalosh e i tregoi
Moisiut me këto fjalë: “Eldadi e Medadi po profetizojnë në tëbanishtë!” Jozuehu, biri
i Nunit, që Moisiu e kishte zgjedhur t’i shërbejë qysh të ri, tha menjëherë: “Ndalojua,
Imzot, Moisi!” Kurse Moisiu përgjigj: “Po a ke smirë për mua? Eh, po të ishte e mundur
që i tërë populli të profetizojë e Zoti t’ia jepte Shpirtin e vet!” Fjala e
Zotit. Falënderojmë Hyjin.
Psalmi 18/19,8.10-14) Urdhërimet
e Zotit japin gëzim
I përsosur është Ligji i Zotit, shpirtin përtërin; për
t’u besuar është Dëshmia e Zotit, të miturve u jep dijen.
E panjollë është
frika e Zotit, nuk ndërron në shekuj të shekujve; gjyqet e Zotit janë të vërteta,
të gjitha njënjë të drejta.
Më të çmueshme se ari, se më i pastri ar, më
të ëmbla se mjalti, se hoja që rrjedh mjaltë. Ruaje shërbëtorin tënd, o Zot, prej
krenisë, që të mos më zotërojë ajo; atëherë do të jem i patëmetë, i pastër
krejtësisht prej mëkatit të madh.
Shërbëtori yt me kujdes i mëson: t’i mbash
ato është fitesë e madhe. Porse kush i heton gabimet? Më pastro, o Zot, prej
mëkateve të fshehta
Leximi II Jak 5,1-6 Është skandaloze, pohon
apostulli Jakob, që një i krishterë zotërues i pasurive të mëdha, harron të varfrit
që kanë të drejtë të jenë të ndihmuar. Nuk ekziston një pasuri individuale dhe kolektive
që të jetë e pafajshme: do të thotë, kombet e pasura apo personat e pasur janë pasuruar
gjithnjë e më shumë në kurriz të kombeve të varfra apo të personave të varfër.
Lexim
prej Letrës së shën Jakobit apostull ( 5,1-6)
Kujdes, tani ju, o pasanikë!
Qani dhe vajtoni për të këqijat që do të vijnë mbi ju! Pasuria juaj u kalb dhe petkat
tuaja i brejti tenja. Ari dhe argjendi juaj u ndryshk dhe ndryshku i tyre do të bëhet
dëshmi kundër jush dhe do ta hajë trupin tuaj porsi zjarr! Keni mbledhur visare për
ditët e fundit! Ja! Paga që u hëngrët punëtorëve që ju korrën arat, bërtet; dhe ofshama
e korrëtarëve arriti në veshët e Zotërisë së ushtrive! Jetuat mbi tokë plot luks dhe
u këndellet në ëndje të prujta, i ushqyet zemrat tuaja për ditën e therjes! E dënuat,
e vratë të drejtin: ai nuk ju kundërshton. Fjala e Zotit. Falënderojmë
Hyjin.
Aleluja. Aleluja. Fjala jote, o Zot, është e vërteta:
na shenjtëro në të vërtetën. Aleluja.
Ungjilli Mk 9, 38-43.45.47-48 Jezusi
qorton dishepujt që nuk tolerojnë dhe u kujton atyre që askush nuk mund të monoplizojë
besimin në Krishtin. Të veprojnë në emër të tij do të thotë që ata duhet të pranojnë
vetveten, të rinjihen si vëllezër: ja një nga shenjat dalluese të Kishës primitive.
Kështu duhet të jetë gjithmonë Kisha armike e çdo diskriminimi, shenjë dhe vend vëllazërimi.
Leximi
i Ungjillit shenjt sipas Markut (9, 38-43.45.47-48) Në atë kohë, Gjoni i tha
Jezusit: “Mësues, e pamë një njeri që i dëbonte djajtë në Emër tënd. Ne ia ndaluam,
sepse ai nuk na ndiqte.” Jezusi i tha: “Mos ia ndaloni! Sepse s’ka njeri që të mund
të bëjë mrekulli në Emrin tim e menjëherë pastaj të flasë keq për mua. Kush nuk është
kundër nesh, është me ne. Ai që do t’ju japë të pini një gotë ujë përse jeni të Krishtit,
për të vërtetë po ju them: me siguri nuk do ta humbë shpërblimin e vet. Porse, për
atë që mëson ndonjërin prej këtyre të vegjëlve që besojnë në mua të mëkatojë, do t’ishte
më mirë t’i varej rreth qafës guri i mullirit e të hidhej në det. Prandaj, nëse dora
jote të çon në mëkat, preje! Më mirë është për ty të hysh dorëcung në jetë se me të
dy duart të shkosh në ferr – në zjarr që s’fiket kurrë. E nëse këmba jote të çon në
mëkat, preje! Më mirë është për ty të hysh në jetë i çalë se t’i kesh të dy këmbët
e të hidhesh në ferr. Po qe se edhe syri yt të çon në mëkat, nxirre! Më mirë është
për ty të hysh në Mbretërinë e Hyjit me një sy se t’i kesh të dy e të hidhesh në ferr
ku krimbi i tyre nuk cof e zjarri nuk fiket. Fjala e Zotit. Lavdi
të qoftë ty, o Krisht!
Më shumë mbi programin tonë kushtuar Liturgjisë
së Fjalës së Zotit të së dielës së 26-të gjatë vitit, mund të dëgjoni këtu…