Սպանիայէն Եւ Փորթուգալէն Ետք Յունաստանի Մէջ ՝՝Ցուցարարներ-Ոստիկանութիւն՝՝ Բախումներ
։
Յունական ոստիկանութիւնը արցունքաբեր ռումբեր արձակեց` ցրուելու համար անիշխանականներ,
որոնք երկրին մէջ տնտեսական սեղմումի քայլերուն դէմ իբրեւ բողոք յայտարարուած միօրեայ
գործադուլի ընթացքին Աթէնքի մէջ խորհրդարանին մօտ հրավառ ռումբեր նետած էին: Բախումները
ընթացք առին կառավարական ծախսերը 11.5 միլիառ եւրոյով կրճատելու ծրագիրին դէմ բողոքի
ցոյցերու ընթացքին: Կրճատումը 31 միլիառ եւրոյի օժանդակութիւն մը ստանալու համար նախապայման
է, սակայն անգործութեան եւ բնակչութեան մէկ երրորդին աղքատութեան չափանիշէն նուազ մակարդակի
վրայ յայտնուելէն ետք ծրագիրը բուռն ընդդիմութիւն կը դիմագրաւէ: Առանց նշեալ օժանդակութեան,
Յունաստան կրնայ շաբաթներ ետք սնանկանալ: Պահպանողական վարչապետ Անթոնիս Սամարասի
կառավարութիւնը կ՛առաջարկէ հանգստեան թոշակները նուազեցնելով եւ հանգստեան կոչուելու
տարիքը 67-ի բարձրացնելով դրամ խնայել: Իսկ Երեքշաբթի օր Սպանիոյ մայրաքաղաք Մատրիտի
մէջ նոյնպիսի քայլերու դէմ բողոքի ցոյցերու ընթացքին ոստիկանութեան հետ բախումի պատճառով
38 անձեր ձերբակալուած էին եւ 64 ուրիշներ վիրաւորուած: Հուսկ Փորթուգալի մէջ կառավարութիւնը
պաշտօնեաներու եկամուտի տուրքերը բարձրացնելու քայլէն հրաժարելու մղած մեծ ցոյցերէն ետք,
նախարարաց խորհուրդը արտակարգ նիստ մը կը գումարէ: