Апостальская Сталіца далучылася да Канвенцыі аб змаганні са злачынствамі супраць дыпламатаў

27 верасня Зала Друку Апостальскай Сталіцы паведаміла, што “Святы Пасад далучаецца да Канфенцыі ААН аб папярэджанні і пакаранні злачынстваў супраць асоб, якія карыстаюцца міжнароднай абаронай, у тым ліку дыпламатычных агентаў. Адзначаецца, што 26 верасня арцыбіскуп Дамінік Мамбэрці, сакратар па адносінах з дзяржавамі перадаў Генаральнаму сакратару ААН адпаведныя дакументы аб прыняцці Апостальскай Сталіцай гэтай Канфенцыі. “Праз далучэнне да яе Святы Пасад пацвердзіў, што надалей будзе ўносіць свой ўклад і спрыяць канкрэтным чынам змаганню са злачынствамі супраць дыпламатаў”, - паведаміла Зала Друку.

“З гэтага пункту гледжання далучэнне да Канвенцыі Апостальскай Сталіцы пацвярджае яе ўвагу да прыладаў міжнароднага супрацоўніцтва ў змаганні са злачыннай дзейнасцю, якая пагражае міру і годнасці чалавека”, - падкрэсліваецца ў паведамленні Апостальскай Сталіцы. Адзначаецца, што гэта ініцыятыва адпавядае той лініі і працэсам, якія ўжо даўно пачаліся ў Ватыкане, з мэтай адаптацыі яго заканадаўства да найвышэйшых міжнародных стандартаў, якія скіраваны на барацьбу з гэтай сур’ёзнай з’явай.