Ipeshkvijtë evropianë në San Galen për të diskutuar për çështje feje e sfida shoqërore
“Sfidat e kohës sonë: aspekte shoqërore e shpirtërore”: kjo është tema e asamblesë
së përgjithshme të kryetarëve të Konferencës Ipeshkvnore të Evropës, të cilët janë
mbledhur në San Galen të Zvicrës, që sot e deri më 30 shtator, për të diskutuar mbi
çështje feje, por edhe mbi sfidat shoqërore bashkohore. Intervistuam zëdhënësin e
Sekretariatit të Këshillit të ipeshkvijve evropianë, Tierrì Bonaventura: Para
së gjithash, flasim për sfida e jo për probleme. Ipeshkvijtë deshën ta përdorin këtë
term për të nënvizuar mundësinë, që ndryshimet aktuale, veçanërisht në Evropë, të
jenë edhe rast për ta përforcuar fenë, për ta rritur kohezionin shoqëror, i cili këto
kohë po kalon vështirësi për shkak të krizës ekonomike. Ndër argumentet e
asamblesë është edhe veprimtaria e Bashkimit Evropian dhe e Këshillit të Evropës.
Cili është kontributi, që duan të japin ipeshkvijtë në Evropën e sotme, në të cilën
qytetarët janë gjithnjë e më të pakënaqur nga institucionet? Është e nevojshme
që ipeshjkvijtë ta kuptojnë mirë se ç’po ndodh. Natyrisht, nuk u takon atyre të thonë
si duhet të veprojë Këshilli i Evropës dhe institucionet e Brukselit, por duhet të
kontribuojmë që t’u kthejmë qytetarëve besimin e humbur, sidomos të krishterëve, të
cilët, nganjëherë, diskriminohen pikërisht për fenë e tyre. Nuk mund të themi se ata
persekutohen në Evropë, por në mënyrë shumë të hollë, në nivelin legjislativ e sidomos
në mendësinë e njerëzve, po hyn një formë diskriminimi e intolerance kundër të krishterëve.
Ky është një fakt i ri! Evropa e krishterë largon – nëse mund të themi kështu – besimtarët
e saj, qytetarët e saj. Asambleja do të flasë edhe për Vitin e Fesë e për
50-vjetorin e hapjes së Koncilit II të Vatikanit. Rast për debat ky, apo jo? Vetë
asambleja, në një farë mënyre, i përfshin këto dy tematika. Pikë së pari, duhet thënë
se këtë vit, Asambleja e Përgjithshme merr gati formën e një shtegtimi. Në San Galen,
kremtohet 1.400 vjetori i mbërritjes së shenjtit irlandez, shën Gal në këtë qytet,
që mban emrin e tij. Prandaj, përmasa shpirtërore e shtegtimit, kremtimet do të kenë
rol të rëndësishëm në takimin tonë. Por do t’i kushtojmë hapësirë edhe përmasës së
bashkimit vëllazëror, kolegjialitetit, shoshitjes së problemeve, dialogut: të gjitha
elemente tipike të Koncilit II të Vatikanit. Edhe vetë këshilli i Konferencave Ipeshkvnore
Evropiane lindi pak pas përfundimit të punimeve të Koncilit, me dëshirën e ipeshkvijve
për të rijetuar përvojën konciliare. Pastaj, duhet të kujtojmë edhe 20-vjetorin e
botimit të Katekizmit të Kishës Katolike… Takimi është gati një formë kremtimi i këtyre
dy çasteve të rëndësishme: feja dhe Koncili II i Vatikanit.