Benedikti XVI: fitorja me çdo kusht e abuzimi me ilaçet e shkatërrojnë sportin
Të njihet e të respektohet dinjiteti i njeriut, që qëndron pas çdo atleti: kështu
u tha sot Papa ekspertëve të mjekësisë sportive, të cilët i priti në audiencë në Kastel
Gandolfo. Mjekët marrin pjesë në Kongresin e 32-të Botëror Fims të Mjekësisë Sportive,
që ka filluar sot në Romë e do të përfundojë më 30 shtator. Por ja ç’tha Benedikti
XVI: “Nganjëherë, suksesi, fama, medaljet e fitimet bëhen e vetmja përparësi
dhe objektiv i atyre, që merren me sport”. Ati i Shenjtë shpjegoi se për të
fituar me çdo kusht, shkelet me këmbë fryma e vërtetë e garës. E denoncoi: “…abuzimin
e keqpërdorimin e mjeteve në dispozicion të mjekësisë moderne”. Sportisti,
vazhdoi Papa, është më shumë se konkurrent në një garë, sepse pas çdo atleti qëndron
njeriu, i thirrur nga Zoti të përsoset moralisht e shpirtërisht, më parë se fizikisht.
Që këndej, këshilla për ekspertët e mjekësisë sportive: “Në këtë mënyrë, ju
do të jeni protagonistë jo vetëm të shëndetit fizik e të përsosmërisë atlektike, por
edhe të përtëritjes morale, shpirtërore e kulturore”. E Benedikti XVI citoi
shën Palin Apostull, i cili, në Letrën drejtuar Korintianëve, e lidh ngushtë stërvitjen
fizike me autokontrollin e trupit, me anë të jetës shpirtërore. Papa kujtoi bukurinë,
misterin dhe mundësitë e çdo njeriu, atlet ose jo. Është hera e parë që Kongresi
Botëror i Mjekësisë Sportive zhvillohet në kryeqytetin italian. Në të marrin pjesë
përfaqësues nga 117 vende në pesë kontinentet. Pas urimeve për punimet e tij, Ati
i Shenjtë e përfundoi audiencën, duke theksuar aftësinë pozitive të sportit për të
bashkuar njerëz e popuj, siç u pa në Olimpiadën dhe në Paraolimpiadën e Londrës, ku
elementi më domethënës, qe vërtet gara, por në emër të paqes.