“Выклікі нашага часу:
сацыяльныя і духоўныя аспекты” – гэта тэма пленарнага пасяджэння старшынь епіскапатаў
Еўропы, якая пройдзе у швейцарскім Санкт-Галене 27-30 верасня. Увядзенне ў форум зробяць
тры дакладчыкі, якія прадставяць тэму з розных поглядаў: французскі біскуп Андрэ-Джозэф
Леанард, Марта Картабія, суддзя Канстытуцыйнага суда Італіі і швейцарскі прафесар
Куно Шэдлер – спецыяліст у эканоміке. Старшыня Рады епіскапатаў Еўропы, арцыбіскуп
Эштэргом-Будапешскі Пэтэр Эрдо расказаў, што паўплывала на выбар тэмы і месца правядзення
сустрэчы. Ён адзначыў, што выбар месца звязаны з успамінам 1400-годдзя прыбыцця ірландскага
прапаведніка і асветніка св. Гала, у горад, які цяпер носіць яго імя. “Мы будзем як
пілігрымы, якія пахіляюцца, каб слухаць св. Гала – чалавека, які вельмі прычыніўся
да евангелізацыі гэтай часткі Швейцарыі. Як і для усіх пілігрымаў, наша сустрэча будзе
адбывацца разам з малітвай і праслаўленнем Бога, праз розныя цэлебрацыі, якія ўключаны
ў праграмы мерапрыемства”, - сказаў іерарх.
Паводле кардынала Эрдо ў гэты час
эканамічных цяжкасцяў, чалавек можа лёгка паддацца самай распаўсюджанай сучаснай хваробе
– адчаю. “Недахоп надзеі – гэта галоўная зло нашага часу”, - сказаў венгерскі іерарх.
Сярод
тэм, якія будуць абмяркоўваць еўрапейскія біскупы: дыскрымінацыя хрысціян ў Еўропе
і іх пераслед у свеце, праца Еўрасаюза і Савета Еўропы, Год веры і 50-годдзе адкрыцця
ІІ Ватыканскага Сабора. У Санкт-Гален прыбудуць таксама прэфект Кангрэгацыі па справах
Біскупаў, кардынал Марк Уэлле, прадстаўнікі кантынентальных біскупскіх аб’яднанняў
з Лацінскай Амерыкі, Афрыкі і каталіцкія іерархі з Казахстана.