FMN: ekonomia akoma e dobët në të ardhmen

Ekonomia botërore po e merr veten gradualisht, por është akoma e dobët dhe nuk jep siguri. Drejtoresha e FMN-së, Kristinë Lagard, duke folur në Uashington për takimin e ardhshëm të Fondit e të Bankës Botërore, në Tokio nga 9 deri më 14 tetor, nuk dha shifra, por deklaroi se, sipas vlerësimeve, prodhimi ekonomik do të ulet.
Pavarësisht nga përpjekjet e mëdha, Evropa mbetet problem. Nuk dihet akoma, nëse ajo do t’i mbajë premtimet për bashkimin e qëndrueshëm e të frytshëm bankar e fiskal. Fondi shpreh shqetësime edhe për të ashtuquajturin “fiscal cliff”, apo për vendimet që duhet të marrë Kongresi i SHBA-së në fund të vitit, përsa i përket kufirit maksimal të borxhit publik e fundit të ndihmave fiskale të epokës së presidentit Bush. Mungesa e marrëveshjes për këto dy pika e bllokon ekonominë më të madhe të botës, natyrisht, me pasoja globale. Së fundi, ngadalësimi i zhvillimit të Kinës dhe i vendeve të tjera si ajo, së bashku me paqëndrueshmërinë e theksuar në Lindjen e Mesme, bëjnë që ekonomia të shihet në rënie. Lagard i kërkoi klasës politike botërore t’i përballojë me guxim sfidat e të mbajë premtimet e dhëna, pasi problemi kryesor i ekonomisë është pikërisht pasiguria.