Mjaft hakmarrjes, kush vret apo bashkëpunon në një vrasje do të përjashtohet nga
Kisha: këtë vendim kanë marrë kryedioqeza e Shkodër-Pultit, dioqeza e Sapës dhe
dioqeza e Lezhës, veprimtaria baritore e ungjillëzuese e të cilave shtrihet në pjesën
veriore të Shqipërisë, zonë e cila muajve të fundit është përshkuar nga një valë e
re e përgjakshme e vrasjeve, e hakmarrjeve apo gjakmarrjeve. “Vrasjet e shumta
që vazhdojnë të ndodhin në territorin e Dioqezave tona dhe jo vetëm aty, shumë prej
të cilave për gjakmarrje, vënë në dukje se ka persona që nuk e zbatojnë Urdhrin e
Hyjit: “Mos Vra”, madje e shkelin atë haptazi, megjithëse e quajnë veten “katolikë
të mirë”. Disa vrasin nganjëherë pa asnjë ngurrim ose hakmerren në mënyrë të përgjakshme
e barbare. Ata shpesh vetëarsyetohen, duke u mbështetur në një traditë shekullore,
e pohojnë se gjoja po zbatojnë Kanunin. Kështu, ata dëshmojnë se i japin më shumë
rëndësi traditës së njerëzve se sa ligjit të Hyjit", shkruhet në dekret. "Kushdo
që bën një vrasje ose bashkëpunon që ajo të bëhet ose ndihmon në mënyrë të qëllimshme
që ajo të ndodhë, në bazë të nenit 1331 te Kodit të së Drejtës Kanonike ndëshkohet
me shkishërim (do të thotë ekskomunikim). Prandaj, në bazë të këtij neni, i shkishëruari
nuk mund të marrë pjesë në kremtimet e shenjta të Kishës, nuk mund të marrë Sakramentet
(rrëfimin, kungimin, krezmimin, kurorën e shenjtë, urdhrin e shenjtë), nuk mund të
marrë sakramendoret, si bekimin e shtëpive, funeralin dhe varrimin e krishterë në
varreza katolike", thuhet ne dekret”. Dekreti i datës 14 shtator 2012, nënshkruar
nga imzot Angelo Massafra, imzot Lucjan Avgustini e imzot Ottavio Vitale, përmban
shkishërimin e atyre besimtarëve katolikë që bëjnë vrasje ose bashkëpunojnë që ajo
të bëhet ose ndihmojnë në mënyrë të qëllimshme që ajo të ndodhë, e kështu në bazë
të nenit 1331 të Kodit të së Drejtës Kanonike të Kishës, këta njerëz shkishërohen.
Mbi këtë masë ndëshkimore të Kishës së dioqezave të përmendura, të dëgjojmë komentin
e njërit prej autorëve, imzot Angelo Massafrën në mikrofonin e Radio Vatikanit..........