Në audiencën e përgjithshme, Papa kujton Libanin: të krishterë e myslimanë, së bashku
kundër ndarjeve e luftrave
Të krishterët e myslimanët duhet të japin së bashku një dëshmi të sinqertë e të vendosur
kundër ndarjeve, dhunës e luftës. Kjo qe thirrja e Papës në audiencën e sotme të përgjithshme,
mbajtur në Sallën Pali VI në Vatikan. Benedikti XVI përshkoi etapat e udhëtimit të
tij apostolik në Liban, ku qëndroi nga 14 deri më 16 shtator, duke e këshilluar edhe
një herë vendin të jetë shembull bashkëjetese në Lindjen e Mesme e në botë. Ati
i Shenjtë theksoi dy aspekte të shtegtimit triditor, të cilat duket qartë se kanë
lënë gjurmë në zemrën e tij e nuk mund të harrohen, ose të nënvlerësohen. Papa u ndal
në pritjen e ngrohtë, që i bënë edhe ndjekësit e Islamit: “Myslimanët më pritën
me respekt të madh e vlerësim të sinqertë; prania e tyre e vazhdueshme më dha mundësinë
të jap një mesazh dialogu e bashkëpunimi ndërmjet krishterimit dhe islamizmit: më
duket se ka ardhur koha të dëshmojmë së bashku, me sinqeritet e vendosmëri, kundër
ndarjeve, kundër dhunës, kundër luftrave”. Më pas, duke përmendur mijëra të
rinjtë libanezë, në festë për takimin me Papën, në afërsi të selisë së Patrikut maronit,
Ati i Shenjtë përshkroi me disa penelata edhe një skenë tjetër, e cila – vërejti –
pati ngjyrat e miqësisë e të solidaritetit: “Duke parë të rinj të krishterë
e myslimanë, që festonin në harmoni të madhe, i nxita të ndërtojnë së bashku të ardhmen
e Libanit e të Lindjes së Mesme dhe ta kundërshtojnë së bashku dhunën e luftën. Pajtimi
e harmonia duhet të jenë më të forta se thonjtë e vdekjes”. Këto janë farat
e shpresës për paqe në Liban e jo vetëm në të, pohoi Benedikti XVI, i cili në fillim
të audiencës deshi të ritheksojë arsyen e vizitës së tij apostolike, në një vend kaq
të ndërlikuar, si përsa i përket historisë, ashtu edhe kronikave të fundit: “Një
udhëtim, që e desha me gjithë shpirt, pavarësisht nga rrethanat e vështira, duke pasur
parasysh se një atë duhet të jetë gjithmonë pranë bijve të vet, kur kanë probleme
të rënda. Ndjeja fort në zemër dëshirën për ta kumtuar paqen, që Zoti i ringjallur
u la dishepujve të vet, në fjalët ‘Ju jap paqen time - سَلاميأُعطيكُم’”. Shtegtimi
në Liban, dukej qartë se ka qenë për Atin e Shenjtë “një ngjarje kishtare mallëngjyese”,
siç e quajti vetë. Papa foli me admirim për dëshminë e flaktë të të krishterëve, të
cilën e preku me dorë në atë tokë, shenjte nga gjurmët e kalimit të Krishtit dhe,
e dhimbshme nga plagët gjithnjë të hapura: “Para vuajtjeve dhe tragjedive, që
karakterizojnë atë zonë të Lindjes së Mesme, shfaqa përkrahjen më të sinqertë për
aspiratat e ligjshme të atyre popullsive të dashura, duke u çuar një mesazh inkurajimi
dhe paqeje. Veçanërisht, më vjen ndërmend konflikti, që po mundon Sirinë, duke shkaktuar,
përveçse mijëra të vdekur, edhe një fluks refugjatësh, që plot dëshpërim, kërkojnë
në rajon siguri e të ardhme; e nuk harroj as gjendjen e vështirë në Irak”. Kulmi
i vizitës për bashkësinë e krishterë, qe pa dyshim, nënshkrimi dhe dorëzimi i Nxitjes
Apostolike pas-sinodale “Kisha në Lindjen e Mesme”. Rast i volitshëm, që Benedikti
XVI të tregonte dashurinë dhe afërsinë e tij me Kishën lokale: “I ftova katolikët
e Lindjes së Mesme ta ngulin vështrimin tek Krishti i kryqëzuar për të gjetur aty
forcën, edhe në situatat e vështira e të dhimbshme, për të kremtuar fitoren e dashurisë
mbi urrejtjen, të faljes mbi hakmarrjen e të bashkimit mbi ndarjen… Megjithëse janë
një ‘grigjë e vogël’, nuk duhet të kenë frikë, me sigurinë se Zoti është gjithnjë
me ta. Papa nuk i harron”. Në përfundim të katekizmit në gjuhë të ndryshme,
Benedikti XVI përshëndeti veçanërisht rregulltarët e shumtë të pranishëm në Sallën
Pali VI, ndër të cilët, abatët benedektinë, ardhur nga e gjithë bota, pjesëmarrësit
e kapitujve të përgjithshëm të Vëllezërve e Motrave të Kongregatës së Zemrës së Krishtit
e të Zojës e të asaj të Adhurimit të Përhershëm, si edhe laikët karmelitanë, të impenjuar
në një kongres ndërkombëtar.