Në Irak, bombë para portës së katedrales së Kirkukut
Një bombë shpërtheu para portës së katedrales kalde kushtuar Zemrës së Krishtit, në
Kirkuk, dioqezë me ipeshkëv imzot Luis Sakon, i cili të dielën, mori nga duart e Papës
Nxitjen Apostolike “Kisha në Lindjen e Mesme”. Bomba ishte fshehur në një qese të
zezë dhe shpërtheu në 9 pa një çerek të së dielës mbrëma, duke shkaktuar dëme të mëdha
materiale, por fatmirësisht, asnjë të plagosur. Sipas policisë, tre njerëz të armatosur
e lanë qesen para portës së katedrales dhe arritën t’u ikin forcave të rendit, të
cilat i panë dhe hapën zjarr. Nuk është diçka e rastit pra, por një akt i vullnetshëm
dhune, menjëherë pasi imzot Sako, duke komentuar vizitën e Benediktit XVI në Liban,
pati theksuar se të krishterët e myslimanët duhet të punojnë së bashku, pasi kanë
të njëjtën të ardhme. “Myslimanët – pati nënvizuar ipeshkvi i Kirkukut – janë 95%
e ne 5%. Ç’duhet të bëjmë? Të promovojmë kulturën e dialogut e të paqes: ky është
misioni ynë si të krishterë. Ndoshta, kjo mund t’i ndihmojë të ndryshojnë edhe mendësinë
e tyre, reagimin e tyre me dhunë”.