“Падворак язычнікаў” – першы раз у лютэранскай краіне
13 верасня ў Стакгольме
пачаўся чарговы этап ініцыятывы Папскай рады па культуры “Падворак язычнікаў” на тэму:
“Свет з Богам ці без Яго?”. Асаблівасць форума ў тым, што ён упершыню праходзіць у
лютэранскай краіне, у той частцы Еўропы, якая асабліва адзначана наступствамі секулярызацыі.
Абмеркаванні ў рамках мерапрыемства адбываюцца ў Каралеўскай Акадэміі навук, у якой
традыцыйна ўручаецца Нобелеўская прэмія, і Стакгольмскім цэнтры для дзяцей з асаблівымі
магчымасцямі. Адкрыў працу “Падворка язычнікаў” кардынал Джанфранка Равазі, старшыня
Папскай рады па культуры.
У інтэрв’ю нашаму радыё іерарх расказаў, што Лютэранская
Царква сёння перажывае глыбокі крызіс і таму досвед знаёмства з яе праблемамі з’яўляецца
вельмі цікавым. Кардынал Равазі падкрэсліў, што “Падворак язычнікаў” аб’яднае атэістаў,
якія аднак паважаюць рэлігіі, тых, хто жыве паводле лютэранскіх традыцый і хто сведчыць
аб сваёй веры. Іерарх расказаў, што у рамках форума адбудзецца дыскусія з адным з
ваяўнічых шведскіх атэістаў, які актыўна выступае за забарону выкарыстання імя Бога
ў афіцыйнай і публічнай мове, а таксама жанчынай-епіскапам з лютэранскай епархіі Лунд.