Հայկական Ցեղասպանութեան կազմակերպիչներէն՝ Ճեմալ փաշայի թոռնիկը՝թուրք յայտնի քրոնիկագիր
Հասան Ճեմալ, յառաջիկայ շաբթուան ընթացքին գիրք մը լոյս պիտի ընծայէ՝ «1915. Հայկական
Ցեղասպանութիւն» վերնագիրով, կը հաղորդէ Պոլսոյ «Ակօս»շաբաթաթերթը: «Առանց առերեսուելու
անցեալի դէպքերուն հետ, ինչպէս կրնանք առաջ ընթանալ: Անցեալի ցաւերուն նկատմամբ լուռ
չենք կրնար մնալ, իսկ 1915ի ցաւը պատմութիւն չէ, այն այսօրուան խնդիր է(նշած է գիրքի
հեղինակը): Գիրքին առաջին գլուխին մէջ ներկայացուած է, թէ ինչպէս է Հասան՝ 2000ական
թուականներու սկիզբը, կը սկսի առաջին անգամն ըլլալով առերեսուիլ Ցեղասպանութեան հետ:
Ան կը պատմէ, թէ ինչպէս 2006ին Հրանդ Տինքի սպանութեան գործով դատական նիստին ընթացքին,
իր ապրածներն ու իմացածները պատմելէ ետք, զինք սկսած են թշնամաբար ընդունելու Թուրքիոյ
մէջ, զինք կոչելով «հայրենիքի դաւաճան»: Գիրքի երկրորդ գլուխին մէջ հեղինակը կը պատմէ,
թէ նախքան 1915 թուականի դէպքերուն մասին իրողութիւնը իմանալը ինչպիսի մտածելակերպ ունեցած
է ինք, եւ թէ ինչպէս այդ մտածելակերպը ժամանակի ընթացքին փոխուած է: Գիրքի երրորդ գլուխը,
որ վերնագրուած է «Փաշայ պապը կամ Ճեմալ փաշայի ընտանիքը», կը պատմէ Ճեմալ փաշայի եւ
անոր ընտանիքի մասին: Հասան Ճեմալ բազմիցս յայտարարած է, որ 1915ի դէպքերը Ցեղասպանութիւն
կը նկատէ եւ 2008ին ան այցելած է Ծիծեռնակաբերդ եւ ծաղիկներ դրած Եղեռնի Զոհերու Յուշարձանին
առջեւ: