Не толькі глядзець,
але і бачыць – сэрцам, душой – заклікаюць кінематаграфісты. Сёння VIII Фестываль хрысціянскіх
фільмаў і тэлеперадач “Магніфікат-2012», які распачаўся 9 верасня ў Мінску, пераехаў
у Глыбокае Віцебскай вобласці. Менавіта тут пройдуць асноўныя прагляды. А ў нядзелю
на св. Імшы ў мінскім архікатэдральным касцёле Імя Найсвяцейшай Панны Марыі сабраліся
арганізатары і ўдзельнікі форума. Яго геаграфія павялічваецца з кожным годам – на
гэты раз упершыню прадстаўлены Азербайджан і Бельгія. А ўвогуле нітка краін цягнецца
ад Атлантычнага акіяну да Чорнага мора, праз Беларусь, канешне. Прывітальнае слова
да прысутных скіраваў арцыбіскуп Клаўдыё Гуджэроці, Апостальскі нунцый у Беларусі.
Ён прызнаўся, што ўбачыўшы праграму фестывалю, быў уражаны. Сёння, як кажуць, у трэндзе
– фільмы аб забойствах, здрадах – гэта тое, што адлюстроўвае “цёмны” бок чалавечага
жыцця. Стужак хрысціянскіх – меньшасць, сярод рэжысёраў існуе пэўная сарамлівасць
паказваць сваю веру праз мастацтва. Але толькі не на “Магніфікаце”.
На конкурс
былі адабраны лепшыя з лепшых. Усяго больш за 40 карцін – 38 дакументальных і 6 анімацыйных
стужак. Гэта розныя па жанру і зместу фільмы – падчас, кардынальна. Але аб’ядноўвае
іх адно – яны маюць сваю місію. Трэба адыходзіць ад штампаў у фільмах такога характару,
здымаць кіно не толькі пра хрысціян і для хрысціян, кажа манахіня Сафія Ешчанка –
прэзідэнт міжнароднага праваслаўнага кінафестывалю “Встреча” з Расіі. Бо сёння часта
атрымоўваецца так, что попыт гледачоў і прапанова рэжысёраў разыходзяцца.
“Гэтыя
фільмы пра людзей, якія здейснілі ў сваім хрысціянскім жыцці нешта для іншых. Такіх
фільмаў шмат. І каталіцкі, і праваслаўны кінематограф мае шмат фільмаў-партрэтаў.
Іншая справа, што гледачам не заўсёды яны патрэбны, ім патрэбна тое, што ім бліжэй.
Вялікая папулярнасцю карыстаюцца фільмы пра паломніцкія падарожжы, пра манастыры,
пра цуды.”
І на самой справе, менавіта іх абмяркоўваюць на форумах, у блогах.
Але арганізатары “Магніфікату” упэўнены – у хрысціянскага кіно ёсць будучыня. За ўсе
8 гадоў існавання фестывалю Крыстына Лялько, старшыня сёлетнега журы, не бачыла пустых
залаў.
“Я бачу, як прыходзяць людзі, бачу, як глядзяць гэта кіно. Ведаеце,
не толькі журы яго глядзіць. І з кожным годам цікавасць менавіта да хрысціянскіх фільмаў
узрастае, і рэха фестывалю разыходзіцца, і больш гледачоў далучаецца”.
Фестываль
“Магніфікат” – унікальны ў сваім родзе. Тут збіраюцца прадстаўнікі розных хрысціянскіх
канфесій. Форум, адзначыў арцыбіскуп Тадэвуш Кандрусевіч, Мітрарапаліт Мінска-Магілёўскі,
будуе мост паміж людзьмі.
“Трэба несці хрысціянскія каштоўнасці ў сучасны
свет. Мы бачым, як людзі жывуць быццам бы Бога не існавала ніколі, нават веруючыя
людзі кажуць “Евангелле – не для мяне, гэта для мяне цяжка”. Людзей у нашых касцёлах
сапраўды шмат, у цэрквах таксама, але мы ведаем, што дзякуючы тэлебачанню, кіно, інтэрнэнту
значна больш людзей могуць прыйсці да Бога”.
А кінафестываляў, якія прыводзяць
да Бога, у свеце застаецца усё менш і менш. Напрыклад, Венецыянскі – “залатыя львы”
знайшлі сваіх уладальнікаў два дні таму. Вынік – дзве статуэткі і спецпрыз журы атрымалі
стужкі не проста антырэлігійныя, скандальныя – супраць адной ужо паданы іск за абразу
пачуццяў вернікаў. Куды ідзем? – пытанне рытарычнае. Але можна быць упэўненым, што
13 верасня на фестывалі “Магніфікат-2012” адзначаць фільмы, якія можна не проста глядзець,
з дапамогай якіх можна бачыць.