Бэнэдыкт XVI: працягваць разважанні аб веры Панны Марыі
8 верасня Бэнэдыкт
XVI сустрэўся з удзельнікамі XXIII Міжнароднага марыялагічнага кангрэса, які праходзіць
4-9 верасня ў Рыме. Папа адзначыў, што тэма форума “Марыялогія пачынаючы ад ІІ Ватыканскага
Сабора”, з’яўляецца вельмі своечасовай, бо як раз зараз Касцёл адзначае 50-годдзе
гэтай вялікай падзеі. Святы Айцец расказаў, што разважанне над верай Панны Марыі ў
гэтым кантэксце з’яўляецца вельмі актуальным, бо ІІ Ватыканскі Сабор адкрываўся менавіта
11 кастрычніка – у той сам дзень, калі ў далёкім 431 г., падчас Эфескага Сабора, Найсвяцейшая
Панна Марыя была названа тытулам “Theotokos” – Маці Божая. Акрамя таго, Папа нагадаў,
што ў гэтым годзе, таксама 11 кастрычніка, у Касцёле пачнецца Год веры, аб якім ён
абвясціў сваім спецыяльным дакументам “Porta fidei”, у якім Панну Марыю прадставіў
як прыклад веры. Нарэшце, Папа нагадаў, што сёння, Касцёл святкуе літургічны успамін
Нараджэння Найсвяцейшай Панны Марыі.
Бэнэдыкт XVI расказаў, што будучы маладым
тэолагам, у якасці эксперта прымаў удзел у працах ІІ Ватыканскага Сабоа і меў магчымасць
пазнаёміцца з рознымі падыходамі да вывучэння ролі Панны Марыі ў гісторыі збаўлення.
Ён адзначыў, што ў той час існавала група Айцоў Сабора, якая настойвала на тым, каб
Марыі быў прысвечаны асаблівы раздзел у дагматычнай канстытуцыі аб Касцёле “Lumen
gentium”. Аднак існавала таксама і іншая група, якая настойвала на стварэнні асобнага
дакумента прысвечанага Маці Божай. Папа расказаў, што ў выніку галасавання, якое прыйшло
29 кастрычніка 1963 г., перавага была аддадзена першай прапанове і такім чынам Марыя
была “ўключана ў фундаментальныя таямніцы хрысціянскай веры”. “Марыя, верай якой была
адзначана асаблівым чынам, была зразумета ў таямніцы любові і адзінстве са Святой
Тройцай; яе супрацоўніцтва з Божым планам збаўлення і пасярэдніцтва з Хрыстом было
ясна падкрэслена і прызнана дапамогай. Такім чынам, яна стала прыкладам і апорай Касцёла,
які ў ёй распазнае самаго сябе, уласнае пакліканне і місію”, - сказаў Папа.
Паводле
Святога Айца тэкст Сабора не раскрывае ўсіх тэмаў звязаных з Паннай Марыяй, але з’яўляецца
кропкай апоры для далейшых разважанняў у тэалагічнай, духоўнай і душпастрыскай сферах.
Да гэтага ён заклікаў удзельнікаў Марыялагічнага кангрэса, каб вера Марыі суправаджала
вернікаў у іх дзейнасці і жыцці паводле паклікання дзяцей Божых.