Լիբանանի Վարչապետ Նաժիպ Միքաթի Կը Զգուշացնէ Լիբանանցիները Սուրիոյ Տագնապին Լիբանան
Փոխադրութենէն ։
Վարչապետ Նեժիպ Միքաթի երէկ «Ռոյթըրզ» լրատու գործակալութեան հետ իր ունեցած հարցազրոյցին
ընթացքին յայտնեց, որ Լիբանան այն երկիրներէն է, ուր կրնայ փոխադրուիլ Սուրիոյ տագնապը`
քաղաքական, ապահովական եւ աշխարհագրական պատճառներով: Ան կոչ ուղղեց լիբանանցիներուն
միասնականութեան, շեշտելով, որ անոնք բոլորը մէկ նաւու մէջ կը գտնուին եւ այդ նաւը կրնայ
ընկղմիլ, եթէ շրջանը հարուածող փոթորիկները հասնին նաեւ անոր: Լիբանանցիները ճշգրիտ
որոշումներ տուած կ՛ըլլան, եթէ անոնք հեռու մնան իրենց շուրջ արձանագրուող իրադարձութիւններէն: «Սուրիոյ
տագնապէն հեռու մնալու կարելիութիւնը կը յաջողի, երբ մենք` իբրեւ լիբանանցիներ, միասնական
գտնուինք եւ մերժենք Սուրիոյ տագնապին Լիբանան ներածումը», ըսաւ Միքաթի: Վարչապետը
աւելցուց, որ եթէ Սուրիոյ տագնապը Լիբանան հասնի, ապա ոչ ոք պիտի բացառուի անոր վտանգէն:
«Ոչ մէկը թող մտածէ, թէ կրնայ օգտուիլ այդ տագնապէն, իսկ ուրիշը կրնայ վտանգի մէջ ըլլալ:
Մենք Լիբանանի մէջ բոլորս նոյն նաւուն վրայ ենք, եւ եթէ այդ նաւուն մէջ ջուր մտնել սկսի`
փոթորիկին իբրեւ հետեւանք, բոլորս պիտի ընկղմինք», ըսաւ ան:
Իր խօսքը ուղղելով
արաբ զբօսաշրջիկներուն եւ յատկապէս Ծոցի երկիրներու քաղաքացիներուն` վարչապետ Միքաթի
նշեց, որ անոնք պէտք չէ վարանին Լիբանան այցելելու` աւելցնելով, որ լիբանանցիները մեծ
յարգանք ունին անոնց նկատմամբ եւ սիրով կ՛ընդունին զանոնք իրենց երկրին մէջ: