Ipeshkvijtë evropianë: kriza nuk është vetëm ekonomike, por sidomos antropologjike
“Në bazën e krizës aktuale, që po kalon kontinenti evropian, nuk janë vetëm problematikat
e rënda, që kanë të bëjnë me sistemet ekonomiko-financiare, por sidomos, është mungesa
e një këndvështrimi antropologjik e shoqëror, të përqendruar mbi solidaritetin dhe
susidiaritetin”: kështu shkruajnë në komunikatën e tyre përfundimtare, ipeshkvijtë
evropianë, të mbledhur në Nikozi të Qipros, nga 3 deri më 5 shtator, për të diskutuar
mbi kohezionin e shoqërisë evropiane. “Politikat shoqërore – lexohet në dokument –
nuk mund të bazohen thjesht mbi të ardhurat, të cilat e sprovojnë rëndë kohezionin
shoqëror të kontinentit të vjetër. E ardhmja e Evropës dhe përjashtimi shoqëror i
njerëzve të saj janë sfida të vërteta për Kishën e impenjuar në kumtimin e Ungjillit
të Krishtit, i cili i sjell botës drejtësinë e paqen e vërtetë”. Sipas ipeshkvijve,
Evropa ka nevojë për krishterimin e të krishterët kanë përgjegjësi të veçantë për
të ardhmen e saj. Edukimi e arsimimi – rrugët, që propozojnë ipeshkvijtë – duhet të
vlerësojnë pasurinë e kulturës evropiane, në mënyrë që artet dhe shkenca të hyjnë
në dialog me fenë, pa integralizma nga të dyja palët.