Pajtimi ndërmjet rusëve dhe polakëve: më 9 shtator, leximi i një mesazhi të përbashkët
Më 9 shtator, në të gjitha kishat e Polonisë, do të lexohet një mesazh i përbashkët
për popullin polak e për atë rus. Ky është njëri nga rezultatet e takimit të 25 gushtit,
në Shenjtëroren e Zojës në Jasna Gora të Çestokovës, menjëherë pas vizitës së Patrikut
rus Kirill në Poloni, më 17 gusht. Gjatë kësaj vizite historike, u nënshkrua një mesazh
i përbashkët për pajtimin ndërmjet dy popujve, të cilët kanë pasur një të kaluar të
vështirë marrëdhëniesh e nuk e shohin me sy të mirë njëri-tjetrin. Mjafton të kujtojmë
masakrën e Katinit, ku me urdhër të Stalinit u vranë 22 mijë oficerë polakë. Deri
në vitin 1989, verisoni zyrtar ia vishte autorësinë e këtij tmerri nazistëve gjermanë.
Tani, të krishterët bëhen protagonistë të një faqeje të re historike, duke mos e lënë
të kaluarën t’ia mbyllë dyert paqes e pajtimit. “Qëllimi i dy Kishave – shkruhet në
mesazh – është të dialogojnë mbi bazën e së vërtetës, të besimit, të vullnetit të
mirë dhe të mirëkuptimit të ndërsjelltë”.