Sonte, në sa ne transmetojmë, Rai Storia i kushton një emision të posaçëm Këshillit
Papnor të Kulturës, në 30 vjetorin e themelimit. Për historinë e këtij dikasteri të
rëndësishëm të Selisë së Shenjtë, flasin kryetari i sotëm, kardinali Xhanfranko Ravazi
dhe paraardhësi i tij, kardinali Paul Poupard.
Kujtojmë se Këshilli Papnor
i Kulturës u themelua me Kushtetutën Apostolike ‘Pastor bonus”, më 28 maj 1982, nga
Papa Gjon Pali II, për të favorizuar lidhjet e Selisë së Shenjtë me botën e kulturës,
duke nxitur dialogun ndërmjet kulturave të ndryshme të kohës sonë. Një nga synimet
kryesore të themelimit ishte e është që qytetërimi t’ia hapë zemrën Ungjillit. E jo
më pak, që kultivuesit e shkencës, të letërsisë e të arteve ta ndjejnë veten pranë
Kishës, e cila i njeh si njerëz në shërbim të së vërtetës, të së mirës e, sidomos,
të asaj Bukurie e cila, sipas thënies së Dostojevskit, që përsëritet shpesh, shpresojmë
se do ta shpëtojë botën. Kryetari i parë i dikasterit ishte kardinali Gabriel-Marie
Garrone (1982-1988), pasuar nga kardinali Paul Joseph Jean Poupard (1988- 2007). Vendin
e tij e zuri kryetari aktual, kardinali Xhanfranko Ravazi, ish-prefekt i Bibliotekës
Ambroziane të Milanos, emëruar nga Papa Benedikti XVI (nga viti 2007). Shumë e
pasur, historia e këtij Këshilli Papnor, ndonëse krejt i ri në moshë. Kohët e fundit,
veç takimeve me artistët e mbarë botës, kujtohet edhe për organizimin e Oborrit të
jo besimtarëve, që u mbajt edhe në Tiranë.Pikërisht për këtë histori po flet kardinali-kryetar,
Ravazi.