திருமணத்தின் புனிதத்தன்மை குறித்த ஸ்காட்லாந்து ஆயர்களின் அறிக்கை

ஆக.27,2012. திருமணம் என்பதற்குப் புது விளக்கம் கொடுக்கவும், ஒரே பாலினத் திருமணங்களைச் சட்டபூர்வமாக அங்கீகரிக்கவும் ஸ்காட்லாந்து அரசு எடுத்துவரும் முயற்சிகள் குறித்து தங்கள் மேய்ப்புப்பணி சுற்றறிக்கையில் கவலையை வெளியிட்டுள்ளனர் அந்நாட்டு ஆயர்கள்.
திருமணத்தின் உண்மைத்தன்மை பாதிக்கப்படும்போது அதைக் காப்பாற்றவேண்டிய பொறுப்பு திருஅவைக்கு உள்ளது என உரைத்துள்ள ஆயர்கள், திருமணத்திற்கு ஆதரவளிக்கும் மற்றும் திருமணத்திற்கான மேய்ப்புப்பணி குறித்த புதிய வழிமுறைகள் கண்டுபிடிக்கப்பட வேண்டியதன் அவசியத்தையும் வலியுறுத்தியுள்ளனர்.
திருமணம் மற்றும் குடும்பத்திற்கென புதிய அவை ஒன்றை உருவாக்கியுள்ளது குறித்த அறிவிப்பையும் வெளியிட்டனர் ஸ்காட்லாந்து ஆயர்கள்.
திருமணத்திற்குப் புதிய அர்த்தங்கள் கொடுக்கும் அரசின் முயற்சிகளுக்கு எதிராக பொதுமக்களின் தொடர்ந்த ஆதரவை நாடும் ஆயர்களின் மேய்ப்புப்பணி சுற்றறிக்கை இஞ்ஞாயிறன்று ஸ்காட்லாந்தின் எல்லாக் கோவில்களிலும் திருப்பலியின்போது வாசிக்கப்பட்டது.