Канферэнцыя біскупаў
ЗША выдала спецыяльныя рэкамендацыі для ўсіх каталіцкіх структур краіны – ад дыяцэзіяльных
прадстаўніцтваў да парафій, рухаў і асацыяцый аб стаўленні да выбараў кандыдатаў на
пост прэзідэнта краіны. У дакуменце ўказваецца на ўніверсальнае вымярэнне Касцёла,
што вызначае неабходнасць заўсёды кіравацца як рэлігійным дзеячам, так і свецкім вернікам,
не партыйнымі інтарэсамі, але агульнай карысцю для ўсяго грамадства. ”Хаця і важна
яскрава ўсведамляць, чаго мы не можам рабіць, яшчэ больш важна , што мы можам і павінны
рабіць: спрыяць дэмакратыі, любіць бліжняга і клапаціцца пра найслабейшых і пакінутых
паміж намі”,- пішуць біскупы ў сваім звароце. У ім дэталёва распрацаваны формы паводзінаў
у даволі частых выпадках. Рэкамендавана абсалютна адмаўляць просьбам кандыдатаў ці
палітычных груп выступаць са сваімі праграмамі ў касцёле, распаўсюджваць праз парафіі
ці падчас каталіцкіх мерапрыемстваў прапагандысцкія матэрыялы. Асаблівы заклік
іерархі скіравалі да свецкіх католікаў, заангажаваных у парафіяльнай працы, каб дзейнічалі
ў адпаведнасці з сацыяльным каталіцкім навучаннем Касцёла ў рамках яго стаўлення
“да суадносін хрысціянскай веры і палітычнага жыцця: палітычная адказнасць за жыццё,
правы чалавека, справядлівасць і мір павінны быць як найбольш эфектыўна пашыраны”,
- адзначаецца ў рэкамендацыях амерыканскіх біскупаў. Галоўнай задачай католікаў у
выбарчай кампаніі, якая ўсё больш распальваецца ў ЗША, біскупы называюць актыўнае
дзеянне для павышэння роўнасці ў грамадстве, дзеля агульнага дабра ў служэнні чалавеку.