Entuziazmi për fluturimin jashtëzakonisht të guximshëm: Pali VI, zbritja në hënë e
takimi me Armstrong-un
Vdekja e Neil Armstrongut, austronautit që në korrik 1969 ishte njeriu i parë që shkeli
mbi trojet e pashkelura të Hënës, i kujtoi përsëri njerëzimit dalldinë e pashoqe që
pati pushtuar zemrën e Planetit, kur ndiqte pa frymë, fatin e njerëzve të Apollo 11.
Njerëz, të cilëve Papa i asokohshëm, Pali VI, u dha disa herë bekimin, duke i vlerësuar
lart e me admirim të madh. Dy ditë që e mahnitën Papën: 20 korrik, pritja; 21 korrik,
bëma. Në zanafillë është, siç do ta quante tri ditë më pas, “tronditja e risisë
dhe e mahnitjes” nga e cila edhe Pali VI u pushtua, ashtu si mbarë njerëzimi, sepse
askush nuk mund të shpëtonte nga mrekullimi. Në lutjen e Engjëllit të Tënzot të mesditës,
të dielën, më 20 korrik 1969, Papa Montini foli për mbrëmjen, që pritej aq shumë,
kur tre astronautët amerikanë duhej të shkelnin mbi trojet e Hënës: “Sot
është ditë e madhe, ditë historike për njerëzimin, në se sonte dy njerëz do të vënë
këmbën mbi Hënë, si urojmë të ndodhë lumturisht, ne e mbarë bota në ankth, në entuziazëm
e në lutje. Do të bënim mirë të meditonim për këtë ngjarje të jashtëzakonshme ...
(Engjëlli i Tënzot, 20 korrik 1969). “Bëjmë mirë të meditojmë...”.
Edhe pse në pritje, si të gjithë, Pali VI ruan kthjelltësinë e mendimit e edhe pakëz
distancë, që hapin shtegun e arsyes, në mes të ekzaltimit kolektiv, që s’di të bëjë
tjetër, veçse të brohorasë për heronjtë e Hënës. Pastaj, ngjarja, për të cilën u shkrua
e u fol pambarimisht, pamjet e së cilës mbetën për muaj e muaj në ekranet e televizioneve.
Ishte nata e 21 korrikut, kur Papa e ndiqte uljen në Hënë përmes Observatorit të Vatikanit,
në Kastel Gandolfo. Atje, në sa këmba e parë njerëzore shkelte mbi trojet e Hënës,
Pali VI falënderonte qiellin, të cilin e ndjenë aq pranë tre njerëzit fluturues. E,
së bashku me ta e me mbarë njerëzimin, Giovanni Batista Montini, shprehte, pa pengëza,
gjithë entuziazmin e tij: “Gloria a Dio! E nderim për ju,
njerëz, që kryet veprën e madhe në hapësirë! Nderim njerëzve përgjegjës, studiues,
ideatorë, organizatorë, operatorë. Nderim të gjithë atyre, që e bënë të mundur fluturimin
tejet të guximshëm! Ju të gjithëve, që u impenjuat në këtë vepër! Nderim
ju, që, të ulur ndërmjet aparateve tuaja të mrekullueshme, qeverisni; ju, që i tregoni
botës veprën e orën në të cilën zgjeron në thellësitë qiellore, sundimin e urtë e
të guximshëm të njeriut! Nderim, përshëndetje e bekim! (Mesazh i Palit
VI). Dy ditë më pas, të mërkurën, më 23 korrik, Papa Montini kryesonte audiencën
e përgjithshme. Kot sa ta kujtojmë argumentin: është, natyrisht, zbarkimi mbi Hënë,
gjë provon edhe një herë deri në ç’masë kjo ngjarje e kishte pushtuar imagjinatën
publike. Por tani, ndërsa astronautët amerikanë përgatiten për zbritjen, është çasti
të mendohen hollësirat e asaj që ndodhi. Në katekizëm, Pali VI shpjegon se feja e
shkenca nuk i kundërvihen njëra-tjetrës, përkundrazi, kush studion, kush kërkon, kush
mendon, nuk mund ta mënjanojë gjithëpraninë objektive te Hyjit, të Krishtit, që mbetet
fillimi e mbarimi i kozmosit e i Hënës. Për Papën, është shumë e rëndësishme të kujtosh
se forca e pandjeshme e Shpirtit frymon edhe mbi ditët, në të cilat të gjithë himnizojnë
teknikën: “Në dehjen e kësaj dite profetike, ngadhënjim i vërtetë i mjeteve
të prodhuara nga njeriu për të sunduar kozmosin, nuk duhet të harrojmë nevojën e
detyrën që ka njeriu për të sunduar vetveten” (Engjëlli i Tënzot, 20 korrik
1969).Fluturimi tejet i guximshëm jetohet nën Kupolën e Shën Pjetrit tre muaj
më pas, kur Pali VI i shtrëngon dorën Neil Armstrong dhe shokëve të tij, Edwin Aldrin
e Michael Collins. Është audienca e 16 tetorit 1969.