Papa Gjon Pali I, në 34-vjetorin e zgjedhjes në fronin e Shën Pjetrit
Me 26 gusht përkujtohet 34-vjetori i zgjedhjes në fronin e Shën Pjetrit të Papës Gjon
Pali I, Albino Luçani. Papnia e tij është një nga më të shkurtrat e historisë së Kishës
Katolike, pasi zgjati vetëm 33 ditë, pas atij 26 gushti të vitit 1978, kur në Sheshin
e Shën Pjetrit jehoi “Habemus Papam”. Në kuadrin e kremtimeve për 100-vjetorin
e lindjes, kardinali Enio Antonieli, ish-kryetar i Këshillit Papnor për Familjen kremton
një meshë përkujtimore në fshatin ku lindi, në Forno di Canale, në veri të Italisë.
Ja një jetëshkrim i shkurtër i këtij pape, pas të cilit erdhi i Lumi Gjon Pali II,
që nuk hezitoi të merrte të njëjtin emër me Papën Luciani, i frymëzuar nga vepra e
paraardhësit, pavarësisht se e shkurtër. Albino Luçani u lind më 17 tetor 1912
në Forno di Canale të Belunos dhe u pagëzua po atë ditë nga mamia Maria Fioko pasi
“në rrezik jete”. Me shëndet të dobët që nga lindja, luftoi për jetën dhe më 19 tetor,
riti i Pagëzimit u përsërit nga një meshtar i famullisë. Në vitin 1923 hyri në Seminarin
e Vogël të Feltres dhe u shugurua meshtar në kishën e Shën Pjetrit në Beluno, më 7
korrik 1935. Shërbeu si famullitar në vende të ndryshme të Belunos dhe u bë edhe zv.drejtor
i Seminarit. Në vitin 1947, përfundoi studimet e teologjisë në Universitetin Papnor
Gregorian e më pas, u emërua Provikar i Përgjithshëm i dioqezës së Belunos, për t’u
bërë në vitin 1954, Vikar i saj. Më 1958, Papa Gjoni XXIII e shuguroi ipeshkëv të
Vitorio Veneto. Mori pjesë në punimet e Koncilit II të Vatikanit e në vitin 1969 u
emërua Patrik i Venedikut nga Papa Pali VI, i cili e vlerësonte jashtëzakonisht, aq
sa më 1973 e krijoi kardinal. Më 26 gusht 1978 u zgjodh papë me emrin e Gjon Palit
I. Vidq në natën ndërmjet 28 e 29 shtatorit e më 4 tetor u varros në Kriptën e Vatikanit.
Më 20 nëntor 2003 filloi të shqyrtohet çështja për lumnimin e tij. Papa Luçani
kujtohet nga të gjithë për buzëqeshjen dhe për mënyrën e thjeshtë, me të cilën u drejtohej
njerëzve. Pavarësisht nga teoritë komplotiste për vdekjen e tij, në mendjet e njerëzve
do të mbetet përgjithnjë, ashtu siç e quanin atëherë, “papa i buzëqeshjes”, ose “buzëqeshja
e Zotit”.