Іракскі навуковец: супраць хрысціян дзейнічаюць пэўныя сілы
Існуюць сілы, якія
дзейнічаюць супраць хрысціянскай прысутнасці на Блізкім Усходзе. У гэтым упэўнены
прафесар Мехдат з Багдадскага універсітэта, які ў інтэрв’ю нашаму радыё падзяліўся
сваімі разважаннямі адносна сітуацыі хрысціянскай меншасці ў Іраку. Паводле навукоўцы
хрысціяне жывуць на тэрыторыі гэтай дзяржавы з І ст. і асабліва на працягу апошніх
50 гадоў зрабілі вялікі ўклад у будаўніцтва Іраку. Ён расказаў, што шмат вызнаўцаў
Хрыста працавала ў галіне медыцыны, адукацыі і на будаўніцтве. “Але цяпер нас менш
і менш. На працягу апошніх 30 гадоў колькасць хрысціян паменшылася з 20% да 5% іракскага
насельніцтва”, - адзначыў прафесар. На яго думку, асноўнай праблемай, для хрысціянскай
супольнасці ў Іраку, з’яўляецца дзейнасць пэўных асобаў, якія спецыяльна ствараюць
праблемы і намагаюцца знішчыць і разбурыць краіну. Гаворачы аб адносінах з мусульманамі,
прафесар Мехдат адзначыў, што яшчэ 40 гадоў таму яны былі на лепшым узроўні. Ён лічыць,
што пэўная віна за гэта ёсць і на слабых іракскіх уладах, якія не ў стане гарантаваць
бяспеку хрысціянам і часта не ўмешваецца ў некаторыі складаныя сітуацыі. Ён расказаў,
аб негатыўных наступствах шматлікіх войнаў, якія прайшлі на тэрыторыі Ірака і эмбарга
якое існавала на працягу 30 гадоў. “Ірак – па-сапраўднаму стомленная краіна. Зараз
эканамічная сітуацыя палепшылася, але грамадскае жыццё пагоршылася, бо няма бяспекі
і спакою. Такім чынам, нават калі эканамічная сітуацыя выглядае лепш, без бяспекі
народ жыць не можа”, - сказаў прафесар Мехдат.