Папа прывітаў удзельнікаў Міжнароднага форума Каталіцкай акцыі
23 жніўня Бэнэдыкт
XVI скіраваў пасланне да ўдзельнікаў Міжнароднага форума Каталіцкай акцыі, які праходзіць
22-26 жніўня ў румынскім Яшы, на тэму “Свецкія вернікі і Каталіцкая акцыя: супольная
касцёльная і сацыяльная адказнасць”. Святы Айцец падкрэсліў, што свецкія вернікі з’яўляюцца
не столькі “паплечнікамі” святароў, колькі “суадказнымі” за стан і дзейнасць Касцёла.
“Таму важна, каб былі кансалідаваны сталыя і дзейсныя свецкія, здольныя зрабіць свой
асаблівы ўнёсак у касцёльную місію, з павагай да служэння і абавязкаў, якія кожны
мае ў жыцці Касцёла і заўсёды ў сардэчнай еднасці з біскупамі”, - сказаў Папа. Пантыфік
заклікаў удзельнікаў форума жыць у духу першых хрысціянскіх супольнасцяў, якія, паводле
Дзеяў Апосталаў, “мелі адно сэрца і адну душу”, а таксама дзейнічаць на карысць місіі
Касцёла праз “малітву, вучобу, актыўны ўдзел у касцёльным жыцці, уважліва і пазітыўна
гледзячы на свет у пастаянным пошуку знакаў часу”.
“Не стамляйцеся заўсёды
ўдасканальваць, дзякуючы штодзённай і сур’ёзнай адукацыі, аспекты вашага асаблівага
паклікання як свецкіх вернікаў, гэта значыць быцця мужнымі і пераканаўчымі сведкамі
ва ўсіх сферах грамадства, каб Евангелле стала святлом якое нясе надзею ў праблематычных
сітуацыях, цяжкасцях, цемры, якую сучасныя людзі сустракаўюць у сваім жыцці”, - сказаў
Бэнэдыкт XVI.
Папа заклікаў удзельнікаў форума абвяшчаць пасланне збаўлення
зразумелай для нашага часу мовай, што з’яўляецца вялікім выклікам для новай евангелізацыі.
“У гэты гістарычны перыяд, у святле сацыяльнага навучання Касцёла, працуйце дзеля
таго, каб стаць лабараторыяй “глабалізацыі ў салідарнасці і любові”, каб расці, разам
з усім Касцёлам, у суадказнасці за тое, каб даць чалавецтву надзею на будучыню, маючы
мужнасць таксама фармуліраваць неабходныя прапановы”, - заклікаў Святы Айцец.