“Liria e vërtetë fetare është fryt i dashurisë së Zotit dhe i betejës shpirtërore
brenda zemrës së njeriut. Kush e fiton këtë betejë, është i lirë në të gjitha aspektet
e tjera të jetës”. Këtë nënvizoi kryeipeshkvi i Justinianës së Re dhe i gjithë Qipros,
Chrysostomos II në Mitingun e Riminit, duke folur në takimin me temë: “Liria fetare:
parimi e pasojat”. Në kuvëndim morën pjesë edhe Salman Shaikh, drejtor i Brooking
Doha Center dhe anëtar i Saban Center për politikën në Lindjen e Mesme; Franco Frattini,
kryetar i Fondacionit “Alcide de Gasperi” dhe kryetari i bashkisë së Romës, Gianni
Alemanno. Konferencën e drejtoi Roberto Fontolan, drejtor i qendrës ndërkombëtare
të lëvizjes “Bashkim e Çlirim”.Në diskutimin e tij, kryeipeshkvi qipriot analizoi
gjendjen dramatike të të krishterëve në veri të ishullit, duke shpjeguar, me fakte,
se pas pushtimit të 1974-ës, besimtarët e krishterë vijojnë të dhunohen e të persekutohen.
Këto vite Ankaraja flaku jashta banesave mijëra familje vendase, duke i zëvendësuar
me kolonë të ardhur nga Anatolia, që rrëmbyen troje e vendbanime. Me shpalljen e Republikës
së Qipros së veriut, më 1983, shteti turk bëri çmos të shlyente çdo gjurmë të fesë
së krishterë, duke shndërruar më se pesëqind ndërtesa kulti në muzeume e xhami e duke
arritur deri atje, sa ta shesë një pjesë të mirë të pasurisë artistike të Kishës
qipriote. E gjithë kjo, vijoi kryeipeshkvi, shkakton dhimbje e vuajtje, në mënyrë
të veçantë sepse ndodh në një vend anëtar të Bashkimit Evropian e edhe të Kombeve
të Bashkuara. Kur shuhet një vatër e krishterë, deklaroi, shuhet një dritë për
mbarë universin! Krishterimi ka një dhuratë të pashembullt: të ndriçojë njerëzimin.
Për Chrysostom-in II, liria fetare nuk mund të kufizohet vetëm në aspektin e tolerancës
politike. Ajo është fryt i thellimit të vlerave morale dhe etike, të skalitura përgjithmonë
në zemrat njerëzore. Ku nuk hapet dy kanatash porta e lirisë fetare, saktësoi, gjithçka
s’është tjetër, veçse amulli. Fjalët e kryipeshkvit qipriot u mbështetën edhe nga
Salman Shaik, që tërhoqi fort vëmendjen e të pranishmëve, duke folur për frytet lirisë
fetare lidhur ngushtë me përvojën e jetës së tij, si mysliman i martuar me një grua
të krishterë. “Gjatë katërmbëdhjetë vjet martese, shpjegoi, e pashë situatën e pakicave
fetare në Lindjen e Mesme dhe në vendet myslimane, në sytë e gruas sime. Pa të krishterët,
kjo zonë do ta humbiste fytyrën e saj të vërtetë”. Drejtori i Brooking Doha Center
foli kryesisht për shtetet, që po jetojnë ndryshime të thella në jetën e tyre, sidomos
pas viteve 2011, me Pranverën arabe. Kjo stinë e re bëri të njohur në mbarë botën
dëshirën e popullsive arabe për dinjitet e liri, por njëkohësisht, pati si pasojë
edhe organizimin e grupeve islamiste (Vëllezërit myslimanë e Salafitë), që më parë
ishin të shtypura nga diktatorët. Për Shaikun, një nga udhët për sigurimin e respektimit
të lirisë fetare, është përfshirja e pakicave në krijimin e qeverive të reja. Studiuesi
citoi shembullin e komitetit të tranzicionit për rindërtimin e Sirisë, që do të përurohet
pas pak ditësh në Kairo, duke u mbështetur përsëri në përvojën e jetës së tij e pikërisht,
në marrëdhëniet ndërmjet gruas së krishterë e nënës, myslimane praktikante. “Duhet
të shkosh deri në fund të fundit të fesë e të kulturës sate, për t’u kuptuar, pastaj,
e edhe për t’u ballafaquar”. Franco Frattini e Gianni Alemanno nënvizuan se është
tepër e nevojshme që Perëndimi të mbrojë vlerat universale, shpesh herë të injoruara
nga autoritetet evropiane e nga mjetet e komunikimit, posaçërisht nga ato italiane.
Shembull i kësaj atmosfere indiferente është qëndrimi ndaj lajmit të burgosjes së
një vajze pakistaneze 11 vjeçare, me kufizime mendore, që mbahet në burg si e pandehur
për blasfemi. Të pakta, gazetat, që u morën me historinë e saj të dhimbshme, revoltuese.
Mjetet kryesore të komunikimit ishin tejet të zëna me mbrojtjen e trios femërore ruse
Pussy Riot, dënuar për dhunimin e një Kishe të Moskës, ku u këndua një pseudo-lutje,
krijuar enkas për t’iu kundërvënë Putinit. Kujtojmë se kënga-pseudolutje i drejtohej
Theotókos (Nënës së Zotit), domethënë Zojës së Bekuar (rusisht Bogorodice),
që të ndërmjetësonte për ta flakur Putinin nga skena e historisë ruse. Kjo pjesë e
këngës u këndua sipas muzikës së Sergej Rachmaninov/a>
(Bogorodice Dievo, radujsja) rusisht: Богородице Дево, радуйся. Në këngë kujtohej
edhe patriku rus Kirili, për të cilin theksohej se i beson shumë më tepër Putinit,
sesa Zotit. Prej këndej, kjo shfaqje e jashtëzakonshme u dënua nga mbarë shoqëria
ruse, që e konsideroi si fyerje të ndjenjave dhe traditave të saj fetare e, natyrisht,
edhe nga Patriku Kiril i cili, gjatë një liturgjie në një nga Kishat e Moskës, uroi
që grupit t’i jepet një përgjigje e rreptë për gjestin blasfem, zgërdhimje e vetë
djallit.