Па ініцыятыве Канферэнцыі
Біскупаў ЗША быў створаны спецыяльны сайт з інфармацыяй аб узроўні беднасці ў краіне,
а таксама спосабах барацьбы з ёй. Партал www.povertyusa.org дае магчымасць пазнаёміцца
з інтэрактыўнымі картамі, статыстыкай беднасці ў кожных з рэгіёнаў Злучаных Штатаў,
а таксама здзейсніць віртуальную экскурсію ў жыццё самых безабароных жыхароў краіны.
Сайт быў створаны Каталіцкай кампаніяй за чалавечае развіццё і Аддзелам епіскапата
ЗША па праблемах справядлівасці, міру і чалавечага развіцця. Штодзённа сайт абнаўляе
навіны аб рэальнай сітуацыі з беднасцю ў краіне. Акрамя таго наведвальнікі вэб-рэсурса
могуць пазнаёміцца з прынцыпамі і прыкладамі дзейнасці невялікіх лакальных арганізацый,
якія працуюць у сферы барацьбы з беднасцю. Паводле апошніх статыстычных дадзеных у
ЗША пражывае каля 46 млн. бедных.
Каталіцкая кампанія за чалавечае развіццё
– з’яўляецца ініцыятывай нацыянальнага ўзроўню пры амерыканскім епіскапаце, якая рэалізуе
праграму па барацьбе з беднасцю, дапамагаючы людзям з нізкімі заробкамі ў пытаннях
якія тычацца іх штодзённасці, утрымання сям’і і жыцця ў грамадстве. У місію кампаніі
ўваходзіць таксама заданне навучыць жыццю ва ўмовах беднасці і пазнаёміць з прычынамі,
якія да яе прыводзяць. Удзельнікі ініцыятывы праводзяць адукацыйныя заняткі на падставе
біблійных тэкстаў і сацыяльнага навучання Касцёла. Каталіцкая кампанія за чалавечае
развіццё шырока падтрымліваецца католікамі ў ЗША, асабліва праз перыядычны збор сродкаў
для бедных у парафіях.