Benedikti XVI në Engjëllin e Tënzot: Jezusi nuk kërkon të pëlqehet, por të japë jetë
të plotë.
“Jezusi, kokrra e grurit, e hedhur në brazdat e historisë”. Për këtë foli dje Papa
në lutjen e Engjëllit të Tënzot, kremtuar nga Pallati Apostolik i Kastel Gandolfos. Shumëzimi
i bukëve dhe i peshqve na flet drejtpërdrejt për kuptimin e ardhjes së Krishtit. E
shpjegon Ai vetë, të nesërmen e mrekullisë, në sinagogën e Kafarnaos. Hyji Atë na
e dërgoi të Birin si bukë për jetën e pasosur, e kjo bukë është korpi i tij, jeta
e tij, flijuar mbi kryq për ne: “Duhet, prandaj, ta pranojmë me fe, pa u
shkandulluar nga natyra e Tij njerëzore; e duhet edhe të hamë korpin e Tij e të pijmë
gjakun e Tij, që të kemi në vetvete jetën e ta kemi të plotë”. Jezusi nuk
foli kurrë për të tërhequr vëmendjen e të tjerëve, për t’u pëlqyer nga turmat, vërejti
Benedikti XVI. Njerëzit, e edhe vetë dishepujt, entuziazmoheshin prej Tij, kur bënte
punë të bindshme. E pas mrekullisë së shumëzimit të bukëve dhe të peshqve, turma deshi
ta mbarte me ngadhënjim Jezusin e ta shpallte Mbret të Izraelit: “Por nuk
ishte kjo, dëshira e Krishtit, i cili pikërisht me këtë fjalim të gjatë, e shoi entuziazmin
dhe shkaktoi shumë mospëlqime e kundërshtime”. Kush dëshiron ta ndjekë
Jezusin, duhet të bëhet një me Të, personalisht e thellësisht: “Prandaj
Jezusi, në Darkën e Mbrame, do të themelonte Sakramentin e Eukaristisë: që dishepujt
e tij të mund ta kenë në vetvete dashurinë e Zotit e, si një korp i vetëm, i bërë
një me Të, ta shtrijnë në botë misterin e shëlbimit”. Njerëzit e kuptuan
se Jezusi nuk ishte mesia, që synonte të ulej mbi një fron tokësor: “Prandaj
e mbajti Fjalimin, për t’i dhënë fund ëndrrës së turmave e, posaçërisht, për t’i nxitur
dishepujt të merrnin një vendim. Në të vërtetë shumë prej tyre, që asokohe, nuk e
ndoqën më”. Prej këndej, ftesa e Papës: “nuk mund të mos mrekullohemi përsëri
nga fjalët e Jezusit”: “Ai, kokrra e grurit, e hedhur në brazdat e historisë,
është fryt i parë i njerëzimit të ri, të çliruar nga kalbësira e mëkatit edhe e vdekjes”. Ta
rizbulojmë, pra, tha në përfundim të katekizmit të djeshëm Benedikti XVI, bukurinë
e Sakramentit të Eukaristisë, që shpreh gjithë përvuajtërinë dhe shenjtërinë e Zotit... “
që u bë i vogël, grimcë e universit, për të na pajtuar plotësisht në dashuri”. Pas
lutjes së Engjëllit të Tënzot, gjatë përshëndetjeve në gjuhë të ndryshme, Papa kujtoi
veçanërisht Patrikun e Moskës dhe të të gjithë Rusive, Kirilli I, këto ditë mysafir
i Kishës ortodokse në Poloni. Gjatë kësaj vizite u takua edhe me ipeshkvijtë katolikë.
Fryt i këtij takimi ishte deklarata e përbashkët, që përshkohet nga dëshira për thellimin
e bashkimit vëllazëror dhe të bashkëpunimit, për të përhapur vlerat ungjillore në
botën e sotme.