Сустрэча еўрапейскай моладзі пад эгідай супольнасці з Тэзэ пройдзе ў Рыме
Супольнасць з Тэзэ
адзначыла на днях чарговую гадавіну смерці свайго заснавальніка брата Ражэ Шульца.
Як падкрэсліў адказны за сувязі са СМІ брат Давід, спадчына заснавальніка экуменічнага
руху – жывая сярод маладых еўрапейцаў. Гэта бачна па іх шматлікім удзеле ў разнастайных
мерапрыемствах напрацягу года. Так, 4 тыс. юнакоў і дзяўчат прыбылі 16 жніўня ў Тэзэ
на жалобнае набажэнства, каб разам маліцца і дзякаваць за заснавальніка экуменічнай
супольнасці. Брат Давід падкрэсліў, што многія маладыя людзі прыехалі шукаць Бога
і знайшлі Яго менавіта на ўзгорку Тэзэ.
“Наш пошук адзінства з Рымам і Святым
Айцом быў заўсёды вельмі, вельмі прысутны з часоў Пія ХІІ. Затым з Янам Паўлам ІІ
– брат Ражэ штогод прыбываў у Рым на сустрэчу з ім. І гэтыя адносіны, гэтыя стасункі
працягваюцца дагэтуль”,- адзначыў адказны за сувязі са СМІ ў супольнасці.
У
храме Тэзэ многія прынялі важныя жыццёвыя рашэнні, нагадаў брат Давід. Супольнасць
нарадзілася як праект прымірэння паміж немцамі і французамі пасля ІІ Сусветнай вайны.
Але цяпер рух ахоплівае ўсю Еўропу, займаецца справамі салідарнасці на міжнародным
узроўні. Так, напрыклад, зараз ажыццяўляецца праект падтрымкі нядаўна створанай дзяржавы
Паўднёвы Судан. Пасля 20-гадовай вайны, было прынята рашэнне будаваць там школу і
займацца адукацыяй дзяцей.
Брат Давід распавёў таксама, што чарговая экуменічная
сустрэча моладзі з усёй Еўропы, якая праводзіцца ў навагодні перыяд, сёлета пройдзе
ў Рыме. Апошні падобны форум праводзіўся ў Вечным горадзе роўна 25 гадоў таму.