Папа спачувае ў сувязі са смерцю Патрыярха Эфіопскай Царквы
Бэнэдыкт XVI скіраваў
спачувальную тэлеграму ў сувязі са смерцю Яго Святасці Абуна Паўла, Прадстаяцеля Эфіопскай
Царквы, Пятага Патрыярха Абісінскага, Каталікоса Эфіопіі. “Я хацеў бы выказаць мае
шчырыя спачуванні членам Святога Сінода, а таксама духавенству, манахам і вернікам
Патрыярхату. - напісаў Папа, - Я да гэтага часу з задавальненнем успамінаю візіты
Патрыярха ў Ватыкан, і, у прыватнасці яго выступленне на другой спецыяльнай асамблеі
Сіноду Біскупаў па Афрыцы 6 кастрычніка 2009 г. і тыя важныя назіранні, якімі ён падзяліўся
з гэтай нагоды”, - дадаў Бэнэдыкт XVI. У тэлеграме Папа ўзгадаў “цвёрдую прыхільнасць”
памерлага справе адзінства хрысціян з дапамогай дыялогу і супрацоўніцтва паміж Эфіопскай
Праваслаўнай Царквой і Каталіцкім Касцёлам. Святы Айцец запэўніў у сваёй малітве за
памерлага іерарха і тых, хто “аплаквае яго”.
Патрыярх памёр у ноч на 16 жніўня
ў Адыс-Абебе ва ўзросце 76 гадоў. Ён цяжка хварэў і апошні час знаходзіўся ў шпіталі.
Абуна Павел нарадзіўся 3 лістапада 1935 г. У маладосці навучаўся ў тэалагічным каледжы
ў Адыс-Абебе, пазней у семінарыі ў Нью-Джэрсі. У 1970-я гады атрымаў біскупскую хіратонію,
але без дазволу дзяржаўных уладаў, таму з 1976 па 1983 гг. ён правёў у турме. З 5
ліпені 1992 г. Павел стаў новым Прадстаяцелем Эфіопскай Царквы. З 2006 г. з’яўляўся
адным з прэзідэнтаў Сусветнай рады Цэркваў.