Արաբական Ծոցի Երկիրներու Աստուածաշունչի Ընկերութեան Ընդհանուր Քարտուղար Հրայր Ճէպէճեան
Հետեւեալ Ցաւակցագիրը Յղած է Ամենապատիւ Ներսէս Պետրոս ԺԹ Կաթողիկոս Պատրիարքին.
Ցաւով իմացանք Հայր Վարդան Եպիսկոպոս Աշգարեանի մահուան գուժը: Անձնապէս՝ երկար տարիներու
վրայ երկարած, ծանօթ ըլլալով երջանկայիշատակ Գերապայծառին, քաջատեղեակ էինք անոր բեղուն
գործունէութեան: Քրիստոսի, Անոր եկեղեցիի եւ Հայ ժողովուրդի մէջ անոր աշխատանքը
մէկ լաւագոյն ապացոյցն էր անոր նուիրական կեանքին, որ եղաւ աշխուժ, անսահման նուիրումով
եւ ծառայութեամբ լեցուն: Հայր Վարդան Եպիսկոպոս Աշգարեանի ծառայութեան կեանքը անշահախնդիր
էր՝ քրիստոնէական սկզբունքով եւ գիտակցութեամբ: Անոր ծառայութիւնը հասաւ եկեղեցիին,
գաղութին, դպրոցին, մշակոյթին, գիրին եւ գրականութեան: Բայց անպայմանօրէն ան հասաւ մարդուն,
որովհետեւ հաւատացած էր կեանքի մէջ մարդկային յարաբերութեան եւ արժէքներու: Կը ցաւակցինք
ձեր բոլորին հետ: Լիբանանահայ գաղութը կորսնցուց իր հաւատաւոր եւ նուիրեալ եկեղեցականներէն
մին, որուն յիշատակը միշտ վառ պիտի մնայ մեր բոլորին մէջ: Կը ցաւիմ որ անձնապէս
չկրցայ ներկայ ըլլալ եւ փոխանցել ցաւակցութիւններս: Կը խնդրեմ ընդունեցէք իմ եւ Արաբական
Ծոցի Աստուածաշունչի Ընկերութեան խորզգած ցաւակցութիւնները ձեզի, Հայ Կաթողիկէ թեմերուն,
Միաբանութեան եւ իր ընտանեկան պարագաներուն: Սուրբ Հոգիին մխիթարութիւնը կը հայցենք ձեր
բոլորին: Ցաւակցօրէն՝ Հրայր Ճէպէճեան Ընդհանուր Քարտուղար Աստուածաշունչի Ընկերութեան
Արաբական Ծոցի Երկիրներու