Нунцый у Германіі: краіна шмат губляе не слухаючы Папу
Апостальскі нунцый
у Германіі арцыбіскуп Жан-Клод Пэрысэ прызнаўся, што Папа вельмі перажывае, што да
яго мала прыслухоўваюцца ў Германіі. Паводле ватыканскага дыпламата, гэта вялікая
страта для радзімы Пантыфіка. У інтэрв’ю “Сhrist und Welt” – дадатку да нямецкага
выдання “Die Zeit”, іерарх выказаў упэўненасць у тым, што Касцёл павінен рабіць больш
намаганняў, каб адказваць на пытанні сучаснага свету. “Мы гаворым аб рэчах, якія людзям
не зразумелыя. Неабходна звяртацца да пачатковых элементаў веры і тлумачыць іх простымі
словамі і вобразнай мовай. Пераказ веры павінен аднавіцца ў сем’ях, бо інакш, можам
закрываць касцёлы”, - адзначыў ватыканскі дыпламат.
Гаворачы аб праблеме “пустых
храмаў” і крызісу святарскіх пакліканняў, нунцый падкрэсліў, што прычына гэтага не
ў бяздзейнасці касцёльных інстытутаў, але ў сучаснай ментальнасці і недахопе веры.
“Мы патрабуем новай культуры супольнасці, супольнага жыцця ў веры. Для гэтага нам
неабходныя такія вялікія ўрачыстасці як Сусветныя дні моладзі ці св. Імшы з удзелам
Папы на вялікіх алімпійскіх стадыёнах. Яны паказваюць, што чалавек не ў адзіноце”,
- сказаў арцыбіскуп Пэрысэ.
Дыпламат крытычна выказаўся адносна спрэчак унутры
Касцёла ў Германіі паміж духавенствам і свецкімі вернікамі. Ён адзначыў, што альтэрнатывай
спору з’яўляецца дыялог, які, у сваю чаргу, з’яўляецца неабходным. “Тыя, хто жадае,
каб правільнай прызнавалася толькі іх пазіцыя, не вядуць дыялогу”, - лічыць арцыбіскуп.
На яго думку, адкрытасць біскупаў на размову са свецкімі ў Германіі з’яўляецца мужным
крокам, але ў ім важна быць вельмі ўважлівым і не дазволіць “перавярнуць Касцёл уверх
нагамі”.